DepEd Cebu para sa Bangon Marawi

Nagsugod na ang Department of Education sa probinsiya sa Sugbo pagtigom og pundo alang sa mga apektadong tinun-an sa Marawi City.

Kini maoy gipahibalo kanako ni Dr. Rhea Mar Angtud ang DepEd Cebu Division Superintindent.

Sa ground floor sa iyang buhatan makita ang plastic nga galon nga maoy gisudlan sa donasyon nga salapi isip kabahin sa maong programa pagtigum ug pundo aron ipamalit ug mga school supplies, bag, uniporme, sapatos ug ubang panginahanglonon sa mga tinun-an sa mga estudyante sa Marawi City.

Matod ni Dr. Angtud karon nga nahuman na ang krisis sa maong ciudad ang

sunod nga gimbuhaton mao ang pagbangon sa mga molupyo uban sa ilang mga estudyante.

Siya nidason, “lisod pagpamalit didto og school

supplies, magpatahi og uniporme, ug uban pang kinahanglanon sama sa toothpaste, toothbrush, sabon, sapatos, tsinelas sa mga tinun-an mao nga nangita ta og paagi unsaon nga sila matabangan samtang naghulat ta sa panahon nga mobalik na ang klase didto.”

Ang DepEd Cebu ni-adopt sa Anguyao Elementary School nga nahimutang sa city proper sa Marawi. Ang maong eskwelahan grabe ka apektado sa gubat ug nagkatibuwaag ang mga tinun-an. Kasagaran nila nagpasilong sa mga evacuation center sa Iligan City ug sa lalawigan sa Lanao del Norte.

Sa pagka karon subra sa 12 mil pesos ang natigum sa mga publikong eskwelahan sa lungsod sa Daan Bantayan.

Sa ato pa kung maka kolekta ang ubang eskwelahan sa ubang mga lungsod maka paabot kita ug mas dako-dako nga pundo.

Apan bisan pa, tungod sa dakong panginahanglan mas bentaha nga mosalmot ang mga pribadong eskwelahan. Kay gawas sa eskwelahan nga gi- adopt duna pa’y daghang eskwelahan didto ang nanginahanglan ug tabang.

Gawas sa mga tinun-an tinguha sab sa DepEd Cebu nga makatabang sa mga magtutudlo ug non-teaching staff didto alang sa ilang mga personal nga gamit. Sama sa ilang uniporme nga posibling naapil ug kasunog human maigo sa bomba.

PRIBADO

Gawas sa monetary contribution sa mga tinun-an sa publikong eskwelahan nabuwagan sab sila ug suporta sa pribadong sektor.

Basin may subra sa ilang grasya nga gustong mopaambit niini sa mga tinun-an didto mahimo kaayo kamo nga makig-alayon sa buhatan ni Dr. Angtud.

Sa akong nasabtan ang gobyerno nag-andam na ug dakong pundo para sa rehabilitasyon sa Marawi.

Apan ang kinahanglanon sa mga tinun-an dinalian kay bisan unsang orasa basta maandam na ang nagusbat nga mga eskwelahan mobalik naman gyud ang klase.