Don’t give up on us

As usual, wa koy nakitang kasuko sa nawong ni Mama. Gitug-anan ko siya sa tinuod.

“Kabahin na sa imong kinabuhi si Noy Donato, Ma, bisag wa mo magkadayon. Gipakita ko lang nila ni Jonas nga miunong ko sa ilang kaguol.”

Miinom ko sa akong juice. Wa na magtingog si Mama. Mipadayon ko pagkaon.

Nianang pagka hapon gikan sa eskuwelahan, midiretso na sab ko sa funeral parlor nga gihayaan ni Noy Donato. Nagkaestoryahay mi sa asawa ni Noy Donato nga si Nang Cresilda. Maayo siyag tinagdan nako. Bisag naa siya sa kaguol apan usahay mopahiyom ug mokatawa siya kon dunay kataw-anan nga among mahisgotan.

Unya, kami na sab si Jonas ang nag-estorya. Sa akong tan-aw kang Jonas, malipayon siya kon iya kong ikaatubang.

“Salamat, ha, Amel, nga giunongan mi nimo?”

“Aw, mao man sab nay husto, Jon.”

Sa pipila ka gabii nga nagkaestoryahay mi si Jonas sa matag higayon nga moduaw ko sa haya ni Noy Donato, inanay ming nagkasuod. Sa adlaw sa lubong ni Noy Donato, mitambong si Mama. Nagkuyog mi. Nagsul-ob siyag sunglasses. Sa dayon nag sulod sa lungon ni Noy Donato sa nitso, namatikdan nako nga naghilak si Mama. Namahid siya sa iyang mga mata sa gikuptan niyang panyo.

Human sa lubong, nakigsulti si Mama kang Nng Cresilda. Nakahigayon mi si Jonas sa pag-estoryahay.

“It’s God will, Jon. Moabot man gyud ta anang tanan, di ba? Kuhaon man gyud ta sa Diyos. Gipahuwaman lang baya sa Diyos kining atong kinabuhi.”

“Yap! Gidawat na namo ni Mama ang pagkamatay ni Papa.”

Nagkuyog sila si Mama ug si Nang Cresilda sa paggawas sa sementeryo. Kami sab si Jonas ang nagkuyog. Unya, nananghid ko kang Nang Cresilda ug Jonas dihang nakigpamauli na nako si Mama. Nagtaksi mi.

Pagka gabii, nahiabot si Papa. Malipayon kaayo ming tulo. Sa gawas gyud mi nag- dinner. Nagpaminaw lang ko kang Mama nga nagsugilon bahin kang Noy Donato.

“Magmalinawon ka na, Love. Ako na lang ang imong hunahunaon.”

Love ang pagtawganay nila ni Mama ug Papa. Nahimuot ko kay gigakos ni Mama si Papa.

“Oo, Love. Hingpit ko nang ihatag nimo ang akong gugma.”

Unya mikiring ang akong selpon. Si Jonas ang nagpadalag message.