‘MIPAHUBO MI-VIDEO’ SA UYAB, PRISO
16-ANYOS MIREKLAMO BATOK SA LALAKENG TAGA CARCAR
Nasikop sa mga sakop sa Anti-Cybercrime Group 7, inabagan sa Carcar City Police Station, ang usa ka 19 anyos human gireklamo sa iyang kanhi hinigugma nga 16 anyos sa Barangay Ocaña, siyudad sa Carcar, niadtong miaging gabii.
Sa dihang uyab pa sila, ang dalaga giingong iyang gipahubo ug gikuhaan og video ug mga hulagway.
Ang video giingon nga iyang gigamit nga panghudlat human siya buwagi sa dalaga, apan tungod niini, mag-atubang siya og daghang mga kaso.
Ang suspek giila nga si Felix dela Concepcion Quindala Jr., taga sitio Puesto, Barangay Napo, siyudad sa Carcar.
Unang mireklamo sa buhatan sa Anti-Cybercrime Group ang 16 anyos nga dalaga, kinsang ngan gipugngan kay menor, human siya padalhi og text messages sa makadaghang mga higayon nga makigbalik kaniya.
Si Quindala giingon nga nihulga kaniya nga kon dili siya mosugot, i-upload niini sa Facebook ang hubo nga hulagway.
Tungod sa kahadlok sa dalaga, nagpatabang na siya sa kapulisan aron mahunong na ang pagpanghulga ug sa kahadlok nga tinud-on ni Quindala ang bahad.
Matod ni Chief Insp. Leo Dofiles, hepe sa ACG-7, nga human nila makuhai sa iyang pamahayag ang dalaga, nakig-alayon dayon sila sa kapulisan sa Carcar alang sa himuon nga entrapment operation.
Nianang pagkahapon sa Nobiyembre 10, 2017, nisugot si Quindala nga magkita sila sa Barangay Ocaña ug pagka alas 7:30 sa gabii, ila dayon nga gidakop ang suspek samtang nakig-estorya kini sa menor de edad.
Nakuha sa mga pulis ang cellular phone ni Quindala ug ilang nakita ang mga text message niini lakip na ang mga hubo nga hulagway sa 16 anyos nga dalagita nga gigamit sa paghulga niini. “Naay video dinhi sa cellphone nga ang nagkuha ang iyang uyab nga gipabuhat siyag nude act ug mga picture nga hubo gyud sa bata,” matod ni Dofiles.
Milanat og usa ka tuig ang relasyon sa duha apan giingong miaslom kini sa miaging mga buwan hinungdan sa ilang panagbuwag.
Apan giingong wa makadawat si Quindala, gani kanunay kini nga mohangyo nga makigbalik ug mohangyo nga makighilawas.
Tungod sa gihimo ni Quindala, mag-atubang siya og daghang mga kaso nga naglakip sa kalapasan sa Article 282 sa Revised Penal Code kun grave threat; kalapasan sa Section 6 sa Republic Act 10175 kun Anti-Cybercrime Law; RA 9262 kun Violence Against Women and Children; ug RA 7610 kun Child Abuse Law.
Natanggong sa Carcar City Police Station ang suspek samtang nagpaabot sa kaso nga ipasaka batok kaniya.
Pahimangno ni Dofiles sa mga babaye nga di mohatag og hubo nga hulagway sa ilang mga higala pinaagi sa internet bisan sa ilang mga hinigugma sanglit usa ni sa hinungdan nga daghan ang nabiktima./