Kita sa CSBT mitubo og P2 milyones
Mitubo og P2.3 milyones ang kita sa Cebu South Bus Terminal nga gipadagan sa kagamhanan sa lalawigan sa Sugbo sa unang siyam ka mga buwan karong 2017 kon itandi sa susamang panahon sa miaging tuig.
Sa comparative report sa CSBT, nasayran nga nikita ang terminal og P51,375,722.62 gikan sa Enero hangtod sa Septiyembre karong tuiga, mas dako kon itandi sa P49,053,604.28 sa susamang panahon sa 2016 ug P47,587,520.99 sa 2015. Si Joey Herrera, terminal
manager, namahayag nga gikan sa Enero hangtod sa Oktubre sa 2017, niabot na og P56,951,264.26 ang koleksyon sa terminal.
Labing dako nagagikan sa abangan sa mga stall nga nikabat og P7,892,362.70; P7,828,670 nakolekta sa mga taxi nga mosud sa terminal; P6,384,580 gikan sa bayad sa paggamit og CR ug P748,851.56 sa ubang koleksyon sud sa terminal.
Sa P56.951 milyones, ang CSBT nikita og labing dako sa Mayo nga niabot og P6,115,854.53.
Matod ni Herrera nga nidagsa ang mga pasahero sa maong buwan gumikan kay daghan ang namakasyon ug namauli sa ilang mga lugar.
Samtang, niubos og P5 milyones ang gipangayo nga pundo sa tagdumala sa CSBT alang sa operasyon niini sa sunod tuig.
Gikan sa P37 milyones karong tuiga, si Herrera niduso og P32 milyones nga budget sa 2018.
Atol sa budget hearing sa Sangguniang Panlalawigan sa Sugbo niadtong Biyernes, si Herrera nipasabot nga niminos ang ilang gipangayo nga pundo alang sa Capital Outlay sa mga imprastruktura kay napatuman na nila ang mga proyekto alang sa terminal sama sa pagbutang og solar panels, fire alarm system, information display system ug pagpaaspalto.
Sunod tuig, P3 milyones nga pundo ang ilang giduso sa capital outlay alang sa dugang pagpalambo sa terminal diin plano nila magpabutang og canopy sa unang quarter sa 2018.