CPDRC mipatuman sa bag-ong security protocol
Nipatuman og kausaban sa security operational protocol ang tinugyanan sa Cebu Provincial Detention and Rehabilitation Center tungod sa padayong pagpalusot og kontrabando sud sa prisohan. Si Audesti Miguel, acting provincial warden sa CPDRC, niusab sa naandan nga mga pamaagi sa pagbantay ug paglihok sud sa pacilidad diin mas estrikto ang gipatuman nga seguridad. Sa iyang giisyu nga memorandum alang sa tanang personnel, iya kining gidid-an nga mosulod o moagi sa restricted area, ang dapit sa backdoor o duol sa kusina kon way security clearance.
Iyang gitahasan ang nadestino sa maong lugar nga badlungon ang moabot sa lugar ug kon magmagahi o mamugos, iyang ipapusil.
“As much as possible, we don’t want to reach that point but I was really serious when I told my personnel nga not to go beyond that if they don’t have
security clearance,” pasabot ni Miguel sa mga tigbalita.
Tumong sa kanhi pulis nga mapugngan ang pagpalusot sa mga kontrabando sa maong dapit.
Ang mga kausaban iyang gihigpitan sa dihang siya na ang nilingkod nga officer-incharge sa pasilidad niadtong Septiyembre.
Atol sa Oplan Galugad niadtong Miyerkules, 122 ka pakite sa gidudahang shabu ang nasakmit nga gidudahan nga gipalusot na usab sa bilanggo ug kakonsabo nga personnel. Sa kasamtangan, ang mga
prison guard giabagan og bantay sa mga sakop sa Provincial Public Safety Company.
Matod ni Miguel ang mga bilanggo gitugotan nga moagi sa luyo apan kini kon dunay security clearance o gitahasan sa pag-andam sa ilang pagkaon.
Siya nidugang nga wa niya tugoti nga moagi ang mga bilanggo sa bisan asa gawas lang sa main entrance duol sa desk
officer station diin masiksik ang ilang dala nga mga butang ug dunay nakabantay nga mga sakop sa PPSC ug K9 units sa Philippine Drug Enforcement Agency (PDEA).
Iya usab pabutangan og pukot ang luyo nga bahin sa pacilidad diin posible ilabay ang kontrabando gikan sa gawas sa compound.
Gawas niini, siya nimando sa pagpalabay sa daang mga
locker sa mga prison guard. Siya nisugyot nga adto ipahimutang ang lockers sa gawas mismo sa compound sa prisohan diin sa kasamtangan naa kini gibutang sa parking lot. “Because I don’t want them leaving anything there,” dugang ni Miguel.