Pamalay
Binasi sa Kinaadman 6:12-16; Salmo 63; 1 Tesalonica 4:1314; ug Mateo 25:1-13
“Walay si bisan kinsa ang makahatag sa wala diha kaniya,” sumala pa sa usa ka panultihon. Kon wala tay kuwarta, wala tay ikagasto. Kon wala tay nahibaloan, wala tay ikatudlo. Kon wala tay kalinaw, dili kita makahatag og kalinaw.
Sentido kumon kini nga prinsipyo apan kanunay ning mahikalimtan. Mahimo tang magpakaaron-ingnon apan molutaw ra gyod ang kamatuoran. Ang magpasagadsagad og hatag sa butang nga wala diha kaniya, mapaulawan kay mogawas ra gyod ang gitagoan.
Buhong kaayo ang atong kasamtangang kalibutan sa impormasyon. Kinahanglan man sad ang impormasyon sa kinabuhi sa tawo. Apan kuwang pa ni. Kon walay laing mga hiyas nga atong palambuon – mga hiyas nga kulturanhon ug espirituhanon – walay padulngan ang atong kinabuhi. Mahinungdanon ang impormasyon kon kini ginamit sa makinaadmanon nga paagi. Kini bitawng “internet” daghan man kaayong impormasyon apan kalata pod ang “false news” – mga panglawgaw – kay kuwang man ta sa kinaadman.
Ang mga danghag nga ulayng babaye nga gihisgotan sa ebanghelyo ni Mateo simbolo sa mga tawo nga nahikalimot pag-umol sa ilang mga kulturanhon ug espirituhanong hiyas. Wa sila maghunahuna sa ilang tumong nga mao ang pagsugat sa pamanhunon inig-abot na niya. Kining pamanhunon simbolo sa maghatag og hingpit nga kahulogan sa kinabuhi. Aron makasugat sila kaniya nanginahanglan silag kinaadmanon dili lamang kaantigo. Ang pagpamalay sa pamanhunon bawsan pod og pagpangandam ug paghulat.
Unsa may basihanan niining kinaadman. Gihisgotan sa laing bahin sa ebanghelyo ni Mateo ang tawo nga magtukod sa balay ibabaw sa balas. Danghag kini. Ang motukod ibabaw sa bato, makinaadmanon. Ang kalahian? Ang makinaadmanon maminaw sa pulong ni Cristo ug buhaton niya kini. Dili ang danghag. Makaingon ta nga ang mga makinaadmanong ulayng babaye maantigong maminaw ug mobuhat sa mga pulong ni Jesus. Mao kini ilang lana nga modan-ag inig-abot sa pamanhunon.
“Ang mangita sa kinaadman dali rang makakaplag kaniya,” sumala pa sa libro sa Kinaadman. Ang mokugi makabaton kaniya kay ang kinaadman mismo maoy makigtagbo kaniya. Si Jesus ang buhing kinaadman nga nagpadayag na ngari kanato diha sa iyang pagpakatawo.
Ang nakanindot pa gyod kay ang tumong sa pag-abot sa pamanhunon mao nga kita paambiton ug pakuyogon niya sa iyang pagkabanhaw. Mao ni punto sa sulat ni San Pablo sa mga taga Tesalonica. Ang kahayag diay alang kanato.
Paigo na ba ang lana nga anaa sa lampara nga mao ang kinabuhi? Unsa pa may angay pangandaman? Naandan na ba nato ang pagpaminaw sa pulong ug pagbuhat sa buot ipahimo kanato ni Jesus? Unsang matang sa bulohaton ang atong naandam? Lakip ba niini ang pagumol sa atong kulturanhon ug espirituhanong kinabuhi?