Epekto sa berde

Naa na sab ning maglalis asay maayo, road bike o mountain bike. Naay ubang bikers maglibog kon unsay mas maayo aning duha. Sa aktibo pa ko sa mga post sa cebucycling.com kaniadto, usa ni sa mga gilalisan. Kaingon nako og nahunong na ni nga lalis, wa pa man diay kay ang bag-ong nangaungo sa biseklita maoy nagbanhaw.

Nahinumdom sab ko nga dunay mga roadie nga nanaka og bukid gamit ang ilang road bike aron lang pagprobar nga kaya nila nga mosubay sa mga dan nga maagian sa MTB. Apan ang mga sakop sa mao nga grupo professional riders ug dunay taas nga kasinatian sa pagsikad. Di ko morekomendar nga mag road bike sa bukid, labina kon ang mga agianan di pa konkreto kay kuyaw sa disgrasya.

Alang nako, di angay itandi lagi ang duha ka biseklita kay gigama sila sa managlahing mga katuyoan ug klase sa terrain.

Alang nako, sa kahimtang sa atoang karsada dinhi, di moabot ang panahon nga mopabarog ko og road bike tungod sa kakuyaw. Daghang mga drayber nga kuwang sa disiplina, pampubliko o pribado man. Mao ni ang rason nga niundang na ko og saka sa ilang Willy sa Busay. Nagkadugay, nagkadaghan na ang mga sakyanan nga mag-agian sa mao nga karsada.

Di mabintahaan

Maanindot og talan-awon ang kabukiran tungod sa daghang mga kahoy. Way lalis niana. Ang mga pagtuon nagpakita sa kaayuhang dala sa berde nga palibot. Gawas nga maayo ang epekto niini sa lawas, duna usab kini kaayuhang dala sa utok. Nagpakita ang mga pagtuon sa epekto niini sa stress sa usa ka tawo. Tingali, tungod kini sa relaxing nga epekto nato.

Kon imo usab nga balikon paglantaw ang atoang kagikan sa karaang panahon, nagpuyo kita sa kalasangan, diin usab nagsukad pagkaporma ang mga komunidad. Lawom kaayo ang epekto sa atoang kanhiay nga bisan sa kadugay na sa panahon, natisok diha sa atoang kaalimungaw ang kaanindot sa berde nga palibot. Lisod lalison kay bisan ang sayantipikong mga pagtuon nagsuporta sa maayong epekto sa kakahuyan sa tagsa tagsa kanato.

Berdeng palibot

Sa modernong mga nasod ug siyudad, labina sa mga nasod sa Kasadpan, ang vacant ug green spaces imong makita. Makaguol kay dinhi sa atoa, baliktad ang nahitabo. Tan-awa ra gud ang atoang mga palibot, nahimo na kining urban jungle.

Ang epekto, dali kaayong mobaha, labina sa mga lupa na kaayong mga dapit. Kaniadto, ang baha sa kasapaan lang. Pero karon, nibalhin na sa mga karsada. Di madugay, ang baha mahimo nang normal. Pagkapait.