Don’t give up on us
Gipasagdan ko sila si Mama ug Papa sa ilang ka-sweet. Maoy gihatagan kog pagtagad ang text message ni Jonas nako. Naghatagay man mig number sa among selpon. “Gd eve. Tu’og ka na?” Ambot ba sab, uy, nga nalipay man kaayo ko sa pagteks ni Jonas nako. Dali ko siyang gireplayan.
“Wa pa ko tu’og uy. Nia mi sa uptown nag-dinner. Bagong abot si Papa.”
“Nindot diay. Naa imong Papa samtang ako, wa na gyuy Papa.”
Nasabtan ko si Jonas. Nahimo siyang sentimental. Nakahunahuna ko nga ilain ang among hisgotan kay di ko gusto nga madugangan ang gibating kaguol ni Jonas.
“Kuan diay, Jon, tu’og na uy kay kuwang ra ba kag katu’og kanunay.” “Bitaw, Amel. Sige, gudnyt.” “Gudnayt sab.” Dali kong replay.
Nakaginhawa kog lawom human mi magteksanay si Jonas. Unya nakapahiyom ko. Nindot kaayo ang feeling ko niadtong tungora.
“Uy, malipayon man ang akong Baby. Na-in-love na man kaha?”
Nabatyagan ko nga namuwa ang akong nawong kay namatikdan diay nila ni Mama ug Papa ang mao kong sitwasyon. Nagpangidhat pa si Papa nako, samtang si Mama nagpahiyom lang. Baby ang tawag ni Papa nako.
“Sus, ka-advance sab ninyog hunahuna, Pa, uy. Wa pa gani.” Nahikatawa na lang sab ko. “Wa mi pagsupak kon makigrelasyon ka nag laki, Amelia, pero pagbinuotan lang gyud sa imong pag-eskuwela. Third year college ka na man sab. May kabuot ka na.”
Miseryuso sila si Papa ug Mama. Igo ko lang gitando si Papa.
“Aw, basta kanang laki nga kasaligan ug di motraydor. Kanang way kaliwat nga mabudhion.”
Morag nasuko si Mama. Naigking ko. Morag nagpasumbingay si Mama nga di siya mosugot nga ang akong boyfriend dunay kaliwat nga mabudhion. Morag si Jonas ang buot niyang ipasabot. Naghilom na lang ko.
Sa pagpanglabay sa mga adlaw, hilom ming magkita si Jonas. Mangaon mi sa fast food, manuroy ug magkuyog sa pagpanimba. Gisuginlan ko siya sa gipahimangno ni Mama nako. Nagmagul-anon siya.
“Di diay katagaan og katumanan ang akong feeling nimo, Amel?”
Nangulitawo gyud si Jonas nako. Naglingkod mi niadtong tungora sa seawall sa SRP. Gikuptan ni Jonas ang akong kamot. Misandig ko sa iyang dughan.
(TAPUSON SUNOD GULA)