Ang akong silingan

PRESCIL I. CANETE, SR. Cordova, Cebu

Kini ang kanunay kong himat-an kada kaadlawon, ang tagawtaw sa bagibian kong silingan nga si Emak. Halos kada buntag gyud nga mahipugwat ko sa akong pagkatulog, ingon man ang akong asawa nga si Rosing. Wala gyud magbaton og kaikog sa ilang mga silingan nga nangatulog pa sa sayong takna sa kabuntagon. Ambot, mao na gyud tingali ni ang iyang batasan kay kada alas kuwatro sa kaadlawon magtagawtaw siya samtang magdigamo sa kusina.

Pun-an pa sa tuktugaok sa mga manok hiniktan ni Eloy nga anaa ilansad sa koral simpig sa balay, dili na gyud ako mahibalik sa pagkatulog. Morag magduhawit ang tagawtaw ni Emak ug ang tuktugaok sa mga manok ni Eloy. Ako na lang ablihan ang transistor radyo sa akong kiliran ug maminaw sa buntagong balita.

Bisag unsa na lang ang ipangyawyaw ni Emak sa iyang mga sakop sa balay ilabi na og dili mobangon pagsayo. ‘’Samuel pagsag-ob didtog tubig! Ilabay unya ang basura kay nanimaho na tang baklag!’’

Makalagot lagi. Nganong dili man lang hinayon pagsulti aron di makatugaw sa mga silingan nga nangatulog pa?

Sayong mangusina si Emak aron pag-andam sa balon ni Sarah kay nagtrabaho man kini sa EPZA ug sayo kining mosulod sa trabaho. Ug si Samuel nag-eskuyla didto sa siyudad. Kini si Samuel mao gayuy yawyawan ni Emak, Mapagan na lang ang ubang igsuon niini. kay dili motabang sa ubang gimbuhaton sa balay ug atua lang magyampungad sa bilyaran ni Yul inig-uli niini gikan sa eskuylahan. Ug dili kay si Samuel lang ang yawyawan, ilakip pa gyud niya si Pinong nga iyang bana nga halos dili na gani makalihok tungod sa gihambin nga balatian. ‘’Iduso nang sugnod, Pinong! Putlan ta unya kas imong tudlo!’’

Inay masuko ka, usahay mahikatawa ka na lang hinuon. Si Pinong intawon nga ander de bunal sa bakya sa iyang asawa, dili lang motingog ug mogawas sa balay nga magtakihod ang mga lakang tungod sa reyuma ug sa panuigon lagi nga gilukdo. Dili niya tubayan si Emak kay gubot na kon iya pang paundayonan.

“Kon ako pa nang asawa, dila ra ang way labod niana!’’ mitakilid ko ug mitanday sa akong asawa.

“Abi nimo, Seloy, daog man god kaayo si Pinong ni Emak. Dili sama nimo nga bagibian sab,’’ giubanan ni Rosing og kusi ang akong kilid. Pino apan sakit nga kusi, morag gituslok og dagom. Gilayog ko na lang ang akong asawa.

Mao ni ang taras ni Emak. Subra ka-bagibian ug himalikas pa gyud kaayo. Si Pinong, pensiyonado baya og P4,000 sa SSS kada buwan apan naputos sa balikas ni Emak. Karon si Pinong, maglisod na intawon pagbikang sa iyang mga tiil tungod sa reyuma ug sa pagpanakit sa iyang hawak. Hinuon, gialimahan siya ni Emak. Giatiman ang pagkaon, ang pagkaligo ingon man sa pagpainom sa tambal nga gitumar niini. Kining tanan gibuhat ni Emak bisan pa man sa iyang pagkabagibian. (KATAPUSAN)