Atty. molangoy og 15 kms.

Mobalik na sab paglangoy sa lawod sa kadagatan karong adlawa ang long-distance

swimmer nga si Ingermar Macarine human siya napakyas pagtiwas sa iyang tahas sa nag- ice nga kadagatan sa English Channel sa miaging tulo ka mga buwan.

Si Macarine, kinsa usa ka abogado ug environmental

advocate, wala’y hunong nga molangoy sa kadagatan sa Bohol gikan sa Pamilacan Island sa lungsod sa Baclayon paingon sa Alona Tropical Resort sa lungsod sa Panglao. Aduna kini gilay-on nga 15 ka mga kilometro.

“I will start at 5 a.m. and I’m expecting to finish this swim between four to six hours,” matod ni Macarine sa interbyu sa Sun.Star Cebu, igsuong buhatan ning mantalaan.

Kini maoy ikapitong higayon nga molangoy si Macarine sa kadagatan sa Bohol nga iyang gisugdan niadto pang 2013.

Milangoy siya’g balik sa kadagatan sa Bohol niadtong 2015, kaduha niadtong 2016 ug kaduha sab ning tuiga.

Niadtong Agusto, si Macarine misuway sa paglangoy sa grabe ka lisod nga tahas sa English Channel nga nanukad sa southern England paingon sa northern France apan naahat siya pag-undang gumikan sa dili maayong panahon.

Gitambagan si Macarine nga dili na luwas kon moahat siya sa pagkompleto sa iyang tahas ug wala na sab siya miinsister.

Nagplano si Macarine nga mosuway siya pagbalik og langoy sa English Channel karong Agusto sa sunod tuig ug ang iyang paglangoy sa Bohol maoy sugod sa iyang preparasyon.

“I’m preparing for my final try to conquer the English Channel,” batbat ni Macarine.