DUGANG WATCHMEN SA CPDRC

Nangayo og dugang 50 ka watchmen ang kadagkuan sa Cebu Provincial Detention and Rehabilitation Center (CPDRC) sa kagamhanan sa lalawigan sa Sugbo.

Si Audesti Miguel, acting provincial warden sa CPDRC, nipaabot ning hangyo ngadto kang Gobernador Hilario Davide III. Sa 50, matod niya, 35 niini ang mga lalake samtang 15 ang mga babaye.

Iyang nakita nga kuwang ang mga sakop sa CPDRC nga maoy tigbantay labi na kon dunay mga husay nga tambungan ang uban niini.

Gawas sa dugang mga tigbantay sa pasilidad, nangayo usab ang CPDRC og lima ka mga sakyanan sa Kapitolyo nga magamit sa paghatod ug pagkuha sa mga piniriso nga motambong og husay sa ilang mga kaso sa lainlaing mga lugar.

Gusto usab niya nga mabansay ang mga prison

guard sa pasilidad aron mas epektibo ang pagtuman sa ilang gimbuhaton sud sa prisohan. “They cannot give what they don’t have... At least, we should armed these people with the basic skills,” pahayag sa officer- incharge sa CPDRC. Siya niasoy nga maglisod sa paghimo sa paper works ang ubang mga personnel sa provincial jail diin 35 porsiyento niini ang maayo nakahimo sa ilang trabaho samtang ang nahabilin nga 65 porsiyento ang gidestino sa mas sayon nga tahas.

Suma pa ni Miguel kinahanglan nga i- evaluate niya ang kahanas sa mga gwardiya ug personnel sa CPDRC aron mahibaw-an kon asa sila mohaom.

Gitagsa-tagsa usab nila og tan-aw ang mga dokumento sa mga bilanggo aron masusi kon kinsa ang kwalipikado nga makagawas pinaagi sa Good Conduct Time Allowance (GCTA).

Niadtong Septiyembre, siyam ka mga piniriso ang nakagawas gumikan sa maayong gipakita sud sa prisohan ug nahimong kwalipikado sa GCTA samtang, pito niadtong Oktubre.

Tinguha ni Miguel nga malugaan ang pasilidad nga 1,400 lang ang kapasidad apan sa kasamtangan giukopahan og 3,632 ka mga bilanggo. Siya nibutyag ang daan nga

conjugal area ug hawanan sa mess hall sa CPDRC ang himuon nga mga selda samtang ang bag-ong conjugal area anha ibalhin sa luyo sa buhatan sa warden.