Seguridad higpitan

Nakatutok ang awtoridad sa seguridad sa kaulohan tungod sa 31st Association of Southeast Asian Nations (ASEAN) Summit nga nagsugod kagahapon, Nobiyembre 12-14. Apan dili maayong luagan ang seguridad sa mga lalawigan nga kabahin sa nasod nga naghost sa importanteng panagtigom sa mga lider sa kanasoran sa rehiyon.

Dakong garbo sa mga Filipino nga ang atong pangulo nga si Presidente Rodrigo R. Duterte maoy tsirman ning tuiga sa 10- member nga ASEAN nga natukod niadtong Agusto 8, 1967 diin ang Pilipinas usa sa mga founding-member uban sa laing unang upat ka mga nasod sa Indonesia, Malaysia, Philippines, Singapore, ug Thailand. Ubang miyembro mao ang Brunei Darussalam, Cambodia, Lao PDR, Singapore, ug Thailand.

Apan ang ubang lider sa mga dagkong nasod sa kalibotan nanambong usab sama nila ni President Donald Trump sa USA, Presidente Vladimir Putin sa Russia, President Xi Jinping sa China ug uban pa. Timaan kini nga gikonsiderar sa ubang bahin sa kalibotan ang kamahinungdanong papel sa ASEAN isip political ug economic block sa rehiyon.

Ug ang kadaghanan sa kalihokan ipahigayon sa Cultural Center of the Philippines (CCP) karong adlawa ug Philippine International Convention Center (PICC) ugma sa Manila, hinungdan nga sirado sa publiko ang CCP complex. Ang summit tukma sa ika-50 nga anibersaryo sa grupo. Manghinaut kita nga undanon ug magmalampuson ang kalihokan sa 31st ASEAN Summit labi na bahin sa kooperasyon sa pagsanta sa terorismo nga naghulga sa rehiyon, malinawong resolusyon sa panag-ilog sa nagpalibot nga kanasotan sa Spratly gruop of islands sa South China Sea ug ang kalamboan sa ekonomiya sa rehiyon.

Matag usa kanato dunay kaakohan sa pagbantay sa seguridad, dili lang kini tahas sa awtoridad. Magpakabana.