Manaut nga mga silingan

Dear Papa Joe,

Tawga lang ko sa ngalan nga Rose na lumad nga taga Mabolo. Minyo ko ug duna duha ka mga anak. Ang akong bana usa ka driver sa jeep de pasaheroan.

Wala man koy problema ani niya, pero ang akong problema kay ang akong mga silingan. Tungod sa kalisod, nitabang ko sa akong bana og pangita og trabaho. Nisulod ko isip masahista pero kanang tarong ha? Tinuod naay bastos nga mga kustomer na manghagad og extra service pero wa gyud ko na patuli kay tarong ko nga pagkababaye. Pero kining akong mga silingan manlibak nga burikat daw ko kay extra daw akong lawas kay basta masahista apil daw baligya ang lawas.

Maryosep tawon mauwaw na lang ko sa akong bana ug mga anak basin motuo. Unya kon moundang ko, makuhaan ang among pangitaan. Mao ni akong suliran ug tambagi ko. ROSE Rose,

Ako pa nimo, di lang ka paapekto ana nila kay ikaw mismo kabahibawo man kaha nga di na tinuod ug di nimo malikayan nga suyaon gyud ning uban, labi na kon moasenso ang usa ka tawo. Makapasemento lang ka sa imong balay, drug lord na man gani ang bugal bugal sa uban.

Busa kon grabe na sad, dangop sa barangay para mabadlong na sila o mapasakaan nimo og kaso para motagam. Pero ang importante diha, Day, no wala mo mangayo nila. Lisod ang kinabuhi ron mao nga ayaw na lang na tagai og kabug-aton. Kana lang ug salamat.

PAPA JOE

(Sa inyong tampo ipadala lang sa papajoesuperb@gmail. com)