Don’t give up on us
Gigakos ko ni Jonas samtang nagsandig ko sa iyang dughan. Namatngonan ko ang kusog nga pagpitik sa iyang kasingkasing.
“Kon gimahal ko nimo, Jon, ayaw i-give up ang imong feeling.”
“Ang buot mong ipasabot, love sab ko nimo, Amel?” Mihangad ko. Gipahiyoman ko si Jonas. Unya mitarong kog lingkod. Mikupot ko sa bukton ni Jonas.
“Una pa gani tikang nakita, nabatyagan ko na nga lain ang pinitik sa akong kasingkasing diha nimo, Jon. Yes. gimahal sab tika.”
Giagbayan ko ni Jonas. Nakita ko sa iyang nawong ang kalipay apan kadali ra kini kay maoy mipuli sa iyang nawong ang kaguol.
“Magmalinawon kaha ta, Amel, nga sa imong sulti, supak man si Mama nimo nako?”
“Ipakita ta niya nga nagminahalay gyud ta, Jon.”
Nahilom si Jonas. Mitan-aw siya didto sa atbang nga isla, ang isla sa Cordova. Gikan sa among gilingkoran sa SRP, makita kaayo ang Cordova. Dunay mga ferry boat nga nagdagan sa dagat.
“Mamisita ko nimo, Amel. Husto ka, di nato angay itago sa imong Mama ang atong relasyon.”
Gituman gud ni Jonas ang iyang gisulti. Pagkasunod gabii, namisita siya nako. Way tingug-tingog si Mama dihang gisultihan ko na sila si Papa sa among pagminahalay ni Jonas. Seryuso kaayo siya nga mitan-aw sa akong boyfriend. Seryuso sab si Papa. Giagbayan niya si Mama ug gibiyaan mi nilang duha si Jonas sa sala.
“Atong mahibaw-an iniglakaw nimo, Jon, kon unsa gyuy reaksyon ug ikasulti ni Mama bahin nato. Sa akong paniid, way problema si Papa.”
“Unta, madawat ko sa imong Mama, Amel.”
Nagtupad mig lingkod si Amel sa taas nga sopa. Nagkuptanay mi sa kamot. Samtang sila si Papa ug Mama didto manglingkod duol sa among kumedor. Kanunay nagpasiplat si Mama namo ni Jonas.
Pagpauli na ni Jonas, nakigdayon si Mama nako.
“Gimahal ba gyud ka ni Jonas, Amelia?” “Sure gyud ka ana, Ma.” Wa na magtingog si Mama. Mitan-aw ko kang Papa. Nagpahiyom siya nako. Timailhan nga wa siyay pagsupak kang Jonas para nako. Unya, gibiyaan ko nila ni Mama ug Papa sa sala.
Sa misunod nga mga gabii, malipayon na si Mama kon mamisita si Jonas nako. Ug kini gikalipay kaayo namo ni Jonas. (KATAPUSAN)