CEBU PROVINCE 14 NA KA GOLD SA BP

Mihimo’g langas ang Cebu Province kagahapon pinaagi sa ilang chess players ug karatekas nga maoy nag-agak kanila sa liderato sa ikaduhang adlaw sa 2017 Batang Pinoy Visayas Qualifiers sa Dumaguete City.

Sa kinatibuk-an, ang Cebu Province nakahipos na og 14 ka gold medals human nakabira og lima ka gold medals ang ilang karatedo team ug upat ka gold medals ang chess squad hangtod ning pagsulat.

Ang swimming team sa Cebu Province nakadugang og tulo ka gold medals samtang nakatampo og tagsa ka

gold medal ang ilang athletics team ug sepak takraw team.

Nagtunol og gold medals sa Cebu Province gikan sa karatedo mao sila si Trisha Ogoc sa girls’ 8-9 years old advance kata, Rhean Jill Negapatan sa girls’ 13-Under intermediate kata, Niko Avila sa boys’ 10-11 advance kata, Alenna Mariz Benitez sa girls’ 14 -15 intermediate kata ug Janine Narbuada sa girls’ 10-11 advance kata. Ang gold medals sa chess team sa Cebu Province gikan nila ni Marian Calimbo sa girls 15-under blitz ug rapid chess, Kristina Concepcion Belano sa girls’ 12-under rapid chess, ug Jeremy Tanudra sa boys’ 15-under blitz chess. Nagsunod sa Cebu Province sa kasamtangang overall standing mao ang Aklan nga adunay pito ka gold medals dayon ang dakbayan sa Sugbo ug Bohol Province nga pulos adunay tag upat ka gold medals.