1 PATAY SA RAKRAK

Usa ang namatay samtang duha ang nangaangol sa pagpangrakrak sa sakyanan sa South Coastal Road sa Barangay Cansojong, siyudad sa Talisay.

Apan ang duha ka mga biktima nga nangaangol gidakop ra usab sa kapulisan human makuhai og bulto sa shabu ingon man armas.

Tungod niini, nagtuo ang kapulisan sa dakbayan sa Talisay nga may kalambigitan sa illegal drugs ang hitabo pasado alas 2:00 kagahapon sa kaadlawon.

Ang namatay giila nga si Alfredo Calica, 20, taga Brgy. Tejero, Cebu City samtang ang mga angol mao sila si Joshua Leonor, 30, taga Brgy. Tinago, Cebu City ug Carlos Briones, 22, taga Brgy. Bulacao.

Base sa pasiunang imbestigasyon, matod ni SP02 Cecilio Miñoza nga ang tulo nagsakay sa awto kolor blue gikan sa dakbayan sa Sugbo paingon sa Talisay.

Apan paghiabot sa nahitaboan kalit silang gituparan sa usa ka awto, kolor puti nga gisakyan sa usa ka Reymund, dayog pamusil tumong sa drayber.

Nahiagom og duha ka mga samad sa lawas ug dughan si Calica, kinsa daling gidala sa Talisay District Hospital, apan namatay.

Si Leonor nga naglingkod tupad ni Calica nakaangkon og samad sa wang bukton samtang si Briones sa tuong tuhod.

Apan ang kapulisan sa Talisay nakakuhag armas nga KG-9 submachine pistol nga adunay lima ka mga bala sa awto nga gisakyan nila ni Calica.

Kini ang hinungdan nga girikisa sila si Leonor ug Briones ug didto na nakuha ang duha ka mga bulto sa shabu gikan sa ilang tagsa-tagsa ka bulsa.

Matod ni Supt. Jason Villamater, hepe sa Talisay Police station, nga posibling gisundan nang daan ang mga biktima apan didto lang gitirahan paghiabot na sa dakbayan sa Talisay.

Nagkanayon si Villamater nga may kalabotan sa illegal nga drugas ang motibo sa ilabi na kay nakuhaan og shabu ang mga biktima o ba kaha personal nga panagbangi tali ni Caloca ug Reymund tungod kay siya ang target.

Si Leonor nibutyag nga sa wa pa ang hitabo, nakabantay na silang daan sa sakyanan nga nagsegig sunod kanila.

Samtang si Calica nisulti kanila nga si Reymund nga naglagot kaniya tungod sa negosyo sa drugas.

Matod ni Miñoza nga nakakuha silag kasayuran nga si Calica bag-ong sulbong sa illegal nga drugas ug gikasuyaan.

Nisaka na sa sidewalk ang gisakyan sa mga biktima samtang nakuha sa dapit ang duha ka kabhang sa bala sa kalibre .45.

Ang duha gipasakaan nag kasong illegal nga paghupot og drugas samtang ilang gitino kon si kinsa ang tag-iya sa armas kaysila pulos nitudlo kang Calica nga maoy tag-iya. /