2 nakuhaan og 21 ka armas
Ang Cebu Port Authority (CPA) Police ningsikop sa duha ka mga tawo ug nasakmitan nila og 21 ka paltik nga mga armas nga dad-on unta paduloing sa Ozamiz City niadtong Dominggo sa gabii.
Nasikop sa port police mao ang mga suspek nga sila si Richel Vallejo Puno, 40, taga Ilaya, Talamban, Cebu City ug ang iyang half-brother nga si Euligiano Bueno Camance, Jr, 43, taga Guinacot, Danao City.
Nasakmit gikan kanila ni Puno ug Camance ang 17 ka mga .45 kalibreng pistola ug upat ka mga kalibre .38 nga revolver.
Si Glenn Sarador, port security manager sa CPA, niingon nga nakadawat sila og intelligence report alang sa suway nga pagpayuhot og mga armas sa pantalan niadtong Sabado.
Bisan kon ang taho nagkanayon nga ang pagpayuhot pagahimuon sa Sabado ug wa madayon, padayong gipakatap sa CPA ang port police hangtod nianang Dominggo.
Aron di makabantay ang mga pulis, gisuwayan og pasa ni Camance ngadto kang Puno ang
bag. “We caught them trying to avoid the x-ray machine for their bag to be screened but we made sure that it passed there and the guns were discovered,” nagkanayon si Sarador.
Si Camanse niingon nga way labot si Puno sa iyang pagpayuhot, apan wa sila tuohi.
Ang duha gitanggong ug pasakaan og kaso.