Maayong matuki ang South China Sea: Davide

Sa pagsugod sa mga tigom sa Association of Southeast Asian Nations (Asean) Summit kagahapon, si Gobernador Hilario Davide III nipadayag nga maayo og matuki og apil ang isyu bahin sa panag-ilog sa mga nasod sa mga isla nga anaa sa South China Sea.

Ang gobernador, chairman sa Regional Peace and Order (RPOC) 7, niingon nga kasagaran sa mga nasod nga mga sakop sa Asean ang nipadayag og kabalaka sa gibuhat sa China pagsakop sa mga isla nga giangkonsa ubang mga nasod sama sa Pilipinas.

Lima ka mga miyembro sa Asean sama sa Pilipinas, Vietnam, Brunei, Indonesia ug Malaysia ang pulos nangangkon nga taga-iya sa pundok sa mga isla, apil sa China.

Niadtong Dominggo, si Pres. Rodrigo Duterte nisugyot nga bisan sa ilang kalahian, ang mga lider di na kinahanglang motuki sa South China Sea.

Ang presidente nipasabot nga mas maayo dili tandugon ang isyu sa South China Sea kay walay gusto makiggubat nga moresulta sa bayolente nga komprontasyon.

Ang mga lider sa China ug 10 ka mga miyembro sa Asean ang nitambong sa ilang tinuig nga summit gibuksan kagahapon sa Manila ubos sa pagpanguna ni Duterte.

Apil sa nitambong ang mga lider sa US, Japan, Canada, South Korea, India, Australia, ug New Zealand.