Tribunalo gipulihan na sa PDRRMO
Bag-o na ang nangulo sa Provincial Environment and Natural Resources Office (Penro) sugod kagahapon.
Si Gob. Hilario Davide III nibutyag nga nilapas na ang usa ka tuig nga pagka officer-incharge ni Baltazar Tribunalo sa Penro hinungdan nga gitudlo niini si Rodel Bontuyan, kasamtangan nga Supervising Environmental Management Specialist sa Penro, isig bagong OIC sa buhatan.
Ang gobernador nipasabot nga base sa regulasyon sa Civil Service Commission kutob lang sa usa ka tuig ang paglingkod sa usa ka position sa usa ka OIC ug kon kini lugwayan kinahanglan nga i-renew kini sa Kapitolyo.
Si Tribunalo nahimong OIC sa Penro sugod niadtong Hulyo sa miaging tuig.
Matod ni Davide nga si Bonifer Nacorda, pangu sa Human Resource Management Office (HRMO), ang nagsulti sa regulasyon sa CSC.
“Nga ang
designation for officer-in-charge should only be for one year unya ni one year naman, that’s why,” pagpasabot sa gobernador.
Sa memoraundum, si Davide nitudlo ni Bontuyan sa bagong position niadtong Nobiyembre 8, 2017 ug kagahapon ang opisyal nga pagsugod niini diin iyang gitigom ang iyang mga sakop sa Penro.
Samtang, si Baltazar makatutok na sa iyang mga gimbuhaton isip pangulo sa Provincial Disaster Risk Reduction and Management Office (PDRRMO).
“Nagpasalamat kaayo ko sa konsiderasyon sa HR ug ni Gov unya mas nigaan ta,” pahayag.
Si Davide niklaro nga way kalambigitan sa kontrobersiya nga giatubang ni Tribunalo, kinsa gipasanginlan nga nanghikap og sampot, ang pagkawala niini sa Penro.
“Himuhimoan na pud unya na og estorya. Mao man nay himuon sa naglagot nato, maghimohimo og estorya bisan di tinuod, mao nay pait ba. We try to do the right thing here, atakehon pa ta, asta mga kauban nato, si Baltz is one,” dugang padayag ni Davide.
Ang position sa pagka pangu sa Penro ang gipublikar sa mantalaan apan way nag-apply.