ANG TUBOD SA KAUSABAN

SuperBalita Cebu - - SUPER BILIB - HERTY B. LOPEZ / Reporter

Bata palang si Robert Chan, 64, dihang nahigmata na siya sa bisyo nga sugal.

Ang iyang amahan usa ka lumad nga Insik, usa usab ka sugarol hinungdan nga siya usab nagdako nga usa ka sugarol.

Tungod sa kalisod sa ilang kinabuhi ug sa kasugarol sa iyang amahan, sayo siyang nakaamgo nga aron mabuhi, kinahanglan siyang magkugi.

Dinhi, nagsugod siya og pamaligya aron iyang masustiner ang iyang pag-eskwela.

Upat ka managsuon ang pamilyang Chan nga lumad nga taga Jimenez, Misamis Occidental.

Dihang patunghaon siya sa iyang ginikanan sa kolehiyo, siya nilarga dinhi paingon sa Sugbo ug karon dinhi na nanimuyo.

Bisan paman sa kasugarol sa amahan ni Robert, apan gidisiplina siya niini dihang nagtungha na siya sa hayskul.

Third year high school siya dihang gipatrabaho sa iyang amahan isip boy sa amigo ra usab niyai nga Insik.

Tungod kay dagko na og sinugalan si Robert, di usab siya motrabaho kon gamay ra og sweldo ang iyang trabahoan.

Wa siya mahibawo nga iyang amahan ra usab diay ang nagsweldo kaniya.

Ang pagpatrabaho kaniya usa kadto ka paagi sa pagdisiplina nga gihimo sa iyang amahan aron di mapareho kaniya nga sugarol ang iyang anak.

SUGAL GIHAPON

Apan nagpaingon pa lang sa Sugbo si Robert, nahurot na iyang ang pangmatrikula ug pang-enrollment tungod kay gisugal niini.

Wa mawagtang ang iyang kasugarol dihang nagtungha na siya sa kursong Commerce sa kaniadtong Colegio del San Jose Recoletes karon University of San Jose Recoloted (USJ-R).

Tanang klase sa sugal iyang naagian.

Naminyo siya sa kaniadto magtutudlo nga si Daisy, dihang 20-anyos pa lang siya.

Wa mahibawo iyang asawa nga bisan kon minyo na sila, mogawas siya sa tungang gabii aron makasugal.

Bisan sa iyang pagkasugarol, nakagradwar hinuon si Robert sa kolehiyo ug nakatrabaho sa shipping companies isip broker.

Usa ka higayon dihang nahibawo na ang iyang asawa sa iyang bisyo sa sugal, nisuway kini pagkutlo sa iyang kinabuhi gamit ang pag-inom og daghang tambal.

Swerte nga wala kini moresulta sa kamatayon apan bisan paman sa maong insidente, wa kini makapahunong sa iyang pagkasugarol.

BIBLIYA

Apan niabot sa iyang kinabuhi ang kausaban nga wa niya damha.

Usa ka higayon dihang nitambong si Robert og bible study, didto siya nagsugod sa pagbag-o.

Sila sa iyahang asawa, parehong relihiyoso.

Aduna’y unom ka anak ang magtiayong Chan.

Matod niya nga wala siya magtuo nga naigo siya dihang naghisgot kang Hesu Kristo ang maong bible study.

Tungod kay nakapalit siya og yuta sa Minglanilla niadtong 2002, butangan unta kini niya og rest house.

Apan dihang nagsugod na og kawot sa dapit, nakita nila ang usa ka tubod.

Ug didto siya nakadesider nga butangan nalang kini og pool aron magamit ang tubig.

Mao kadto ang rason karon sa malampuson na nga Tubod Flowing Water Resort sa Tubod, Minglanilla.

Karon, usa si Robert sa Board of Elders sa Word of Living, usa ka Christian Church sa nasod.

Abli na usab ang laing resort ni Robert atbang sa Tubod Flowing, ang Tubod Bukid Resort.

Plano pa niya nga magbutang og wave pool resort luyo sa Tubod Flowing.

Kining tanan wa niya paabutang moabot sa iyang kinabuhi. /

/ TAMPO

■ ANG KAUSABAN: Sama sa nagumon kanhi sa sugal si Robert Chan kay bisan sa kalisod, mangita gihapon siya og higayon nga makahimo niini. Apan tungod sa iyang kasinatian sa pagbukas sa Bibliya, kalit nga nituyok ang iyang kinabuhi ngadto sa maayong kausaban. Niini, gigrasyahan si Robert sa negusyong wa niya paabutang moabot kaniya.

Newspapers in Tagalog

Newspapers from Philippines

© PressReader. All rights reserved.