Silot ni Isabel Lopez

Naunay sa iyang kaugalingong tari kini si Maria Isabel Lopez, ang aktres ug kanhi beauty queen, tungod sa iyang salawayon nga binuhatan nga iya ra pod nga gipost sa iyang social media account niadtong Sabado. Dakong kalapasan sa traffic rules ang iyang gihimo kay tiaw mo bay iyang gipangkuha ug gipadaplin ang mga traffic barriers sa Ortigas ug Shaw Boulevard nga gibutang sa lane nga alang ra unta sa mga delegado sa Association of Southeast Asian Nations (Asean) Summit.

Nasagmuyo man gud ni si Lopez sa dihang naigo siya sa labihang ka traffic sa maong lugar ug aron kini makaipsot, iyang gipangkuha ang mga traffic cone.

Didto yano ug malipayon pa nga nakapanghambog si Lopez nga iyang nalingkawasan ang kahuot sa dagan sa trapiko. Daghan usab ang misunod dayon ni Lopez nga mga sakyanan. Tungod sa iyang gi-post, gibaha siya sa mga pagsaway sa mga netizens.

Ang Land Transportation Office (LTO) ug ang Department of Transportation (DOTr) nagtinguha karon sa pagkanselar sa lisensiya ni Lopez kinsa nakahimo og tulo ka violations.

Kini mao ang pagbaliwala sa traffic signs, Anti Dristrated Driving Act ug reckless driving. Ila na kining gipadad-an og summon kagahapon.

Nangayo man tuod siya og pasaylo, pero mora man og di kini angay nga himuong basehan aron dili na lang siya masilutan.

Nakasabot ta kon unsa kasakit ug kalisod na unya ni Lopez kon mawad-an siya og lisensiya apan duna may giingon nga “no one is above the law” so kinahanglan nga mapahamtangan siya og silot.

Pero kining pagkanselar sa iyang lisensiya hangtod sa hangtod bug-at ra sab siguro nga silot alang kaniya ilabi na kay nangayo na siya og pasaylo. Ang pagsuspenso kaha og labing minos duha ka tuig, makahatag na kini niya og igong leksiyon.