Walay respeto sa kababayen-an

Kusganong gisaway sa mga opposition councilors ug sa netizens ang kanhi “laos nga pulitiko” gumikan sa iyang gipost sa iyang Facebook account nga naghulagway sa mga opposition sa konseho nga susama og baho sa pribadong parte sa lawas sa babaye. Kini human mibabag ang opposition councilors sa iyang plano nga mopalit og deodorizer o pahumot aron i-spray sa Inayawan Sanitary Landfill aron pang-alkontra sa baho niini.

Hinuon, nangayo siya og pasaylo ug gitangtang na ang maong post. Miangkon siya nga dili siya maoy nag-post niadto ug iya kunong sultihan ang nagbutang niini. Basi sa akong nahibaw-aw nga ang iyang anak nga si Miguel maoy nagdumala sa iyang Facebook account kay wala na siyay panahon niana.

Unsa pa may panahon niya para nianang Facebook? Ayaw kog ingna nga naa ra siya magyampungad atubangan sa computer o sa iyang smart phone. Gikinahanglan nga mogahin kag dakong oras niana. Nagtuo man gani ko nga dili na siya computer literate o dili makamaomg mogamit anang iyang smartphone. Text ug tawag ra siguro ang iyang nahibaw-an.

Kon si Miguel man ang responsable niadtong maong

post, maka-ingon ko nga walay respeto kining maong bata sa iyang inahan mismo nga si Margot, sa iyang asawa nga si Bea ug sa tanang kababayen-an. Gikinahanglan pa ba nga isulti nga baho ang kinatawo sa kababayen-an? Dakong binastos ang maong post. Baho lahi pero daghan ang nagpatay.

Kon mohimakak ang “kanhi laos nga pulitiko” nga ang maong post binuhatan ni Miguel dan ato siyang hagiton nga hinganlan ug ipagawas ang tawo nga nagbutang niadto aron atong pangutan-on kon dili ba baho ang iyang gi-agian sa dihang gipakatawo siya dinhi sa kalibutan. Lehitimo ang maong isyu nga gisupak sa mga opposition councilors nganong tubagon man og niyabag. Nahutdan na sila og argumento maong mamersonal na sila?

Dakong binastos ang maong post. Baho lahi pero daghan ang nagpatay.