Nagduda

Dear Noy Kulas,

Just call me Rhix. Kining akong problema parte ni sa akong uyab nga grabe ka palahubog ug ka himarkada.

Nagkaila mi aning akong uyab pinaagi sa akong ig-agaw nga iyang kauban sa trabaho. Daan na kong gisultihan sa akong ig-agaw kon unsay bisyo aning bayhana ug unsay background. Angkan ning bayhana ug single mother.

Ambot ba, Noy Kulas, nahigugma man ko aning bayhana nga 15 ka tuig nako nga manghod unya di pa maayo og background. Wa gani ko mag-expect nga iya kong sugton tungod sa among age gap.

Pirme ming mag-away tungod sa iyang pagsige og laag ug kuyog sa mga barkada. Kadaghan na ko niya suwayi og buwag pero wa ko mosugot kay love lagi nako. Karon, mabdos na siya pero nagduha-duha ko kon ako ba ang amahan kay sa tanang mga babaye nga niagi nako, siya ra ang naingon ani. Nahigugma ko pero nagduha-duha ko kon ako ba ang amahan. Unsa man kahay maayo nakong buhaton, Noy? Ako kaha siyang sultihan sa akong pagduda? Ako ba kaha ang amahan? Unsa may labing maayo nakong buhaton? RHIX Rhix,

Nahinumdom ko sa akong usa ka higala nga nakauyab og sama anang imong girlfriend, nakurat siya nga human sila magkabuwag, iya na lang nahibaw-an nga mabdos ang babaye. Didto na niya nahibaw-an sa iyang mga pagsusi nga mabdos ang iyang uyab og usa ka buwan dihang sila nagkarelasyon. Maayo gani wa niya mahilabti ang babaye.

Wa ko mag-ingon nga tinuod ang imong pagduda, apan naa sab kay basehanan niini. Kay di baya matag-an nga sa kahubog, dunay di maayong mahitabo. Ang mahimo nimo karon mao ang pag-atiman sa babaye kay lisod pa mahibaw-an kon ikaw ba ang amahan nianang iyang gisabak. Imo nga obligasyon ang pag-amuma assuming nga ikaw ang amahan nianang iyang gisabak. Kon manganak na, mahimo nimong ipa DNA test ang bata aron masuta kon imoha ba gyud ni.

Apan sa pagkakaron, ayaw siya hasula ug hatagig problema samtang nagsabak. Mas maayo gani nga imo siyang alam-alaman, di una maghubog hubog kay di makaayo sa iyang gisabak. Sa pagkakaron, ayaw pagbuhat og mga lakang nga maghimong komplikado sa sitwasyon kay basin imo unya ning mahayan, labina kay nahigugma ka og maayo anang bayhana. NOY KULAS