Don’t go away
Wa gyud ko makapugong sa akong kaugalingon, uy. Nakahilak gyud ko. Morag sa akong paminaw mawad-an kog tigpanalipod. Nahunahuna ko dayon dihang gagmay pa mi, sa nag-eskuwela pa sa elementarya.
“Ikaw, ha, isumbong gyud tika kang Xander!” Mihilak ko pag-ayo. Giaway na sab ko sa bugoy kong klasmet sa first grade.
“Weeee! Hadlok ko anang imong Xander! Ha! Ha! Ha!”
Gihiwian ko ug gikataw-an lang ni Greg. Ambot ba sab ni siya, uy, kontra man kaayo ko niya. Gikalit lang niyag labnot ang akong buhok samtang naglingkod ko sa gawas sa among klasrom kay vacant period man namo.
“Bayot!” Gisingkahan ko si Greg. “Ang laki nga manglabnot og buhok sa babaye, bayot gyud!” “Unsay bayot?” Mibawos kog hiwi kang Greg. Midagan ko kay labnuton na sab unta niya ang akong buhok. Apan naapsan gyud ko niya. Nakuptan niya ang akong buhok apan kalit siyang natumba. Nahiabot diay si Xander nga gikan sa CR. Gisumbag niya si Greg. Naghilak si Greg nga mitindog.
“Biiii! Bayot gyud. Ha! Ha! Ha!” Mikatawa ko pag-ayo. Babaye ra ang mohilak, uy!”
Nagsigeg hilak si Greg nga midagan paingon sa sulod sa among klasrom. Misumbong siya sa among maestra.
“Wa lang unta nimo siya sumbaga, Xander. Na, ipatawag gyud ka sa prinsipal ani.” Nabalaka ko.
“Sagdi lang. Isulti ko man sab ang tinuod. Basta, di ko gusto nga binuangan ug pasakitan ka!”
Gipahiyoman ko si Xander. Para nako, siya ang akong anghel nga magbalantay.
Gipatawag gyud si Xander sa prinsipal, aw, apil na sab si Greg. Paggawas nila sa office sa prinsipal, nag-agbayay na sila. Malipayon sila. Unsa may nakaon sa duha? Ug a- kong nahibaw-an nga giuli diay sila sa prinsipal ug gipasaad nga di na mag-away. Gipapanumpa sab si Greg nga di na mangaway og babaye labi na gyud nako.
Sukad niadto, wa na gyud ko awaya ni Greg. Apan sa pag-eskuwela namo sa hayiskol, kanunay na sab kong sulug-sulugon sa akong mga klasmet. Unsaon man gud, bisag hapit na ko madalaga, sip-unon gihapon ko. Ug kay naa man si Xander, iya kong panalipdan. Makakita gud og sinumbagay si Xander tungod sa iyang paglaban nako.
Ug karon nga moeskuwela na mig college, mobiya si Xander nako? (SUMPAYAN)