Ang madyikero

Gibantog nga maayong laki si Lito salamangka kun madyik sa Baryo Lawis. Daghan ang mga dapit nga kanunay niya adtuon aron pagpahigayon og kalingawan, ilabi na kon mapista. Daghan siyag magdadayeg sa gihuptan niyang abilidad sa madyik.

Diha kadtoy usa ka higayon nga mikuha siya og sapyaw. Iyang gipakita sa mga tawo nga misaksi sa iyang pasundayag nga walay sulod ang itom nga sapyaw nga gibali-bali niya pagpakita sa mga tawo. Unya gisapyaw niya ang hangin ug unya gikuha niya ang usa ka itlog sa sulod niini. Nanghugyaw ang mga tawo nga nalipay sa gipakita niyang abilidad. Mingsudlot ang ilang mga kalimutaw dihang gisapyaw na sab ni Lito ang hangin ug gikuha ang usa ka bandol nga kuwarta nga tag 50 pesos. Nagpanglad-ok ang mga tawo sa ilang nakita.

“Madawat ba kaha nang kuwartaha, no?” matod sa usa ka tawo nga yagpison ngadto sa iyang katupad.

“Madawag gyud kana kay kuwarta na god na!” tubag sa busngion og panagway.

Ang pagka inila ni Lito isip madyikero miabot sa lainlaing dapit, nga maoy nakapatingkag sa mga dalunggan ni Mr. Tan, amahan sa babayeng maoy nakapapitik og gugma sa kasingkasing ni Lito, si Marife. Nahigugma si Lito kang Marife bisan og managlahi ang ilang kahimtang. Si Marife anak og asiyendero samtang si Lito kabos.

Bisan supak sa iyang kabubut-on ang matang sa iyang panginabuhi nga mao ang paghatag og kalingawan sa mga tawo matag pista, iyang gibuhat. Ug dili malikayan nga may motamihid kaniya. Ang importante nga mabuhi siya ug labaw sa tanan, mahiduol siya kang Marife.

Dihay higayon nga nagkasugat sila si Lito ug si Mr. Tan. Gitulisok siya pag-ayo ni Mr. Tan. Igo lang siyang miduko ug gipalapos sa pikas niyang dalunggan ang mga mahait nga pulong ni Mr. Tan.

Usa ka higayon nagkasultianay sila si Lito ug si Marife. Hapon kadto ug didto sila sa hardin nilang Marife..

“Kon tinuod kang madyikero, Lit, nganong di man nimo madyikon ang kasingkasing ni Papa aron mahimong malumo ang tig-a niyang balatian?” sukot ni Marife.

“Dili ko mahimong manduan ang kasingkasing sa imong amahan. Ang tinuod nga pagbati maunun- gon, maluntaron ug andam mosakripisyo,” ni Lito, ang iyang panan-aw gipunting sa terasa sa balay nilang Marife. Nagbantay siya nga dili sila makit-an ni Mr. Tan.

Bugtong si Marife lang ang nasayod sa sekreto ni Lito mahitungod sa gihuptan niyang abilidad sa salamangka. Misalig siya kang Marife kay iya man kining gihigugma. Gitug-anan niya ang dalaga nga ang gahom niya sa madyik hinatag sa iyang nahigala nga Agta nga si Macumao nga mitabang kaniya kaniadto sa iyang kakabos hangtod nga nahimo siyang madyikero.

ATOL sa pista sa Baryo Lawis mapasigarbuhon si Lito nga mipasundayag sa iyang mga madyik ug salamangka. Miduol siya kang Marife nga misaksi kuyog ni Mr. Tan. Nabatyagan ni Lito nga nagpangagot ang mga bag-ang ni Mr. Tan samtang nagsud-ong kaniya. Gituman ni Lito ang sugyot kaniadto ni Marife nga suwayan ang gahom sa iyang madyik ngadto sa tig-a nga balatian sa amahan niini. Gitutokan pag-ayo ni Lito si Mr. Tan nga mitutok pagbawos kaniya. Unya nabatyagan ni Lito sa panagway ni Mr. Tan nga migaan ang buot niini kaniya. Dihay mibathay nga pahiyom sa mga ngabil ni Mr. Tan. Apan unya, dihay usa ka sipang buto sa pusil milanog ug maoy nakapahagba kang Lito sa yuta.

Nagbasol si Mr. Tan sa iyang pagsuhol og usa ka tawo aron patyon si Lito. Dali siyang mimando nga dad-on dayon si Lito sa ospital sa lungsod kay nagpitik pa ang kasingkasing niini.

(KATAPUSAN)