Record ni James nabuak ni Ball

Duha ka semana ug usa ka adlaw gikan sa iyang pagsaulog sa ika-20 nga kasumaran sa adlawng natawhan, ang rookie sa Los Angeles Lakers nga si Lonzo Ball mikulit og record sa iyang unang triple-double nga performance sa NBA.

Siya mitali og 19 puntos, 12 ka rebounds ug 13 ka assists sa ilang kapildihan sa Milwaukee Bucks niadtong Dominggo.

Niini iyang gibuak ang nahimo ni LeBron James, superstar sa Cleveland Cavaliers, nga pinakabata nga nakaposte sa unang triple-double performance sa NBA. Sa iyang kabatan-on, gipaabot nga daghan pa unyang makab-ot si Ball sa iyang karera sa NBA.