Blatche padayong missing sa Gilas 5

Padayon gihapong wala si Andray Blatche sa preparasyon sa Gilas Pilipinas alang sa umaabot nga FIBA World Cup qualifiers, usa ka adlaw human sa nakatakda niyang pag-abot.

Apan ang naturalized player nagoakita og senyales nga sa dili madugay, makig-uban ra siya’g balik sa Gilas.

Sa iyang Instagram account @draylive kagahapon, si Blatche nag- post og hulagway sa Gilas squad nga katapusan niyang giduwaan niadtong 2017 Seaba tournament.

Usa kini ka timailhan nga andam si Blatche nga moduwa og balik sa Gilas alang sa mas lisod nga tahas sa World Cup qualifier nga sugdan karong Nobiyembre 24 sa Tokyo, Japan.

“Be back with my brothers real soon to take care of business,” post ni Blatche nga adunay hashtag #puso.

Si Blatche nakatakdang moabot sa nasod niadtong Dominggo apan wala kini mitunga sa praktis sa Gilas kagahapon sa buntag.

Sa sayo pa, gipasabot na’ng daan ni Gilas coach Chot Reyes nga wala’y kaseguroan nga moduwa si Blatche hangtod nga dili kini magpakita.

“We hope he would be here on the 12th, but you’ll never know with Andray until he arrives,” asoy ni Reyes sa interbyu sa Spin.ph. “That’s the only time you’ll know he’s here – pag dating niya.”

Ningtunga sa praktis kagahapon sila si June Mar Fajardo, Mac Belo, Allein Maliksi, Troy Rosario, Kevin Alas, Calvin Abueva, Matthew Wright, Carl Cruz, Gabe Norwood, Roger Pogoy, Japeth Aguilar, ug Raymond Almazan.