KAMATAYON SA 2 KA MGA MASUSO GIPASUSI

Gitahasan ni Lapu-Lapu City Mayor Paz Radaza ang City Attorney’s Office sa pagsusi sa kamatayon sa duha ka mga masuso.

Giangkon ni Radaza nga kuwang pa ang iyang impormasyon sa kamatayon nila ni Ghirvaughn McReign Limpangog, tulo ka buwan; ug Ayesha Mae Suson, upat ka buwan, pulos taga Brgy. Pajac.

Samtang gihulagway ni Lapu-Lapu City Health Officer Rodolfo Berame nga “fake news” nga gibasol ang bakuna sa kamatayon niadtong duha ka mga masuso.

Gitataw ni Berame nga base sa natala sa death certificate ni Limpangog, ang hinungdan sa kamatayon niini mao meningitis samtang acute gastroentiritis with severe dehydration ang hinungdan sa kamatayon ni Suson.

Sila si Limpangog ug Suson gipabakunahan niadtong Nobiyembre 8 diin si Limpangog anaa na sa iyang ika-duha nga dosage sa Pentavalent vaccine.

Ang bakuna pambatok sa Haemphilus Influenza type B (HIB), whooping cough, tetanus, hepatitis B ug diphtheria. Samtang ang PCV (pneumococcal) vaccine nga gidapat kang Suson pangbatok sa pneumonia.

Niadtong Nobiyembre 11 sa hapon, nagdungan og kamatay ang duha ka mga masuso sa Vicente Sotto Memorial Medical Center (VSMMC).

“Nganong i-blame man nila ang vaccine? Base sa WHO (World Health Organization) WHO guidelines sa Pentavalent (vaccine), wa gyuy history of serious side effects ini,” matod pa sa opisyal.

Nagduda si Berame nga hayan wa motug-an ang ginikanan sa maong mga bata sa dihang wa pa mabakunahi nga aduna na kiniy gibate daan sanglit di mohatag og bakuna ang health center ko dunay sakit ang bata.

Matag pabakuna sa mga bata, ang health officer sa barangay mohatag og pre ug

post conference sa tanang mga ginikanan nga nagpahibawo sa matang sa bakuna ug unsay gamit niini.

Inig human sa pagbakuna, adunay post conference sa ginikanan diin tambagan sila sa mga angay buhaton sa higayon nga mohilanat ang bata diin normal nga mahitabo human sa vaccination.

Kon hilantan, gikanahanglan nga pa-imnon og paracetamol ug ang pagbutang og hot

compress sa bahin sa lawas diin gi- inject ang bakuna aron di molagom ug mohubag ang samad.

Dugang pa ni Berame sa kadugay na niya nga nagserbisyo sa city health ug ang paghatag og bakuna sa nagkadaiyang

barangay health center, mao kini ang unang insedente nga nahitabo sa Lapu-Lapu. /