Hinabang sa Cebu City ngadto sa Ormoc ug Surigao kanselahon ni Osmeña

Gianunsiyo ni Cebu City Mayor Tomas Osmeña nga dili na niya dayunon ang paghatag sa P12 milyones nga hinabang sa syudad ngadto sa dakbayan sa Ormoc, Leyte ug sa Surigao.

Kini human nawagtangan og gana ang mayor kay matod pa niini nga dili interesado ang maong mga local government unit (LGU) sa maong hinabang. Apan ang opisyal sa dakbayan sa Ormoc nangayo og rekonsiderasyon sa mayor.

Matod ni Osmeña nga imbes nga ihatag niya ngadto sa Ormoc ug Surigao ang maong kwarta, ilaha nalang kining i-donar sa mga sundawo kansang kinabuhi nakalas atol sa gubat sa Marawi City.

Dihang ang Ormoc naigo sa kusog nga linog gipadala ni Osmeña si kanhi konsehal Alvin Dizon aron mosusi kon unsay mahimong matabang sa syudad kanila.

Human sa assessment, nadesisyon sa syudad nga mohatag og P10 million sa Ormoc aron gamiton pagpalit og generator sets aron magamit alang sa water pumps.

Matod pa nga si Dizon nag- sige og follow-up apan wala’y tubag nga nadawat hinungdan nga ikanselar kini sa mayor.

Ang siyudad gikatakda usab nga mohatag og P2 milyones nga hinabang sa Surigao nga naapektuhan sa kusog nga linog nga gi- assess pangulo sa Cebu city Disaster Risk Reduction Management Office(CCDRRMO) Nagiel Bañacia..

Apan susama gihapon sa Ormoc giingong ang kagamhanan sa Surigao daw sa dili sab interesado sa tabang sa syudad.

Si Ormoc City Acting Mayor, Councilor Rolando Villasencio, nagkanayon nga gilihok na nila ang maong papeles sa hinabang. Matod ni Villasencio, nadawat nila ang Memoradum of Agreement ( MOA) niadtong Oktubre 30.

Napasa kini sa City Legal Office pagka Nobiyembre 4 ug napasa sa Sangguniang Panlungsod pagka Nobiyembre 7.

Apan sa Enero gikatakda nga itunol sa dakbayan sa Sugbo ang P12 milyones ngadto sa usa ka grupo nga mohimo og fund raising alang sa fallen soldiers sa Marawi.