‘Sonic weapon’

Nakurat. Wala makaandam. Ang mga militanteng grupo nga nagprotesta sa kaulohan niadtong Lunes, atol sa pag-abli sa 31st Association of Southeast Nations (Asean), tungod sa paggamit sa kapulisan sa Long Range Acoustic Device (LRAD), nailang “sonic weapon.” Ang naasoy nga device, mohatag og makabungol nga tingog, seguro unang higayon nga gigamit kini batok sa pagpuhag sa kagubot sa mga raliyesta nga wala na mobali sa kakusog sa tubig gikan sa fire trucks ug buot nang mosulod sa gidiling dapit gipaubos sa higpit nga seguridad sa summit.

Si Director Oscar Albayalde, hepe sa National Capital Region Police Office (NCRPO), niangko nga mao kadto ang ilang “secret weapon” kon maglisod na sa pagkontrolar sa raliyesta ug nidason nga ang LRAD dili makamatay apan mohatag og temporaryong dili maayong pamati sa dunggan.

Apan si Renato Reyes sa Bag-ong Alyansang Makabayan (Bayan) niingon nga gidesenyo kini sa pagpuhag sa rali ug dugang niya, delikado human makaapekto kini sa tanan bisan ang walay labot sa protesta o nanag-istambay lang duol sa dapit. Usa kini ka paglapas sa tawhanong katungod, dason ni Reyes. Subay sa atong pag-aninaw, tungod kay unang higayon pa ang paggamit sa LRAD batok sa dagkong rally, wala kita masayod nga madawat ba kini nga kahimanan subay sa balaud ug makatawhanon ba.

Maayo nga ang grupo ni Reyes mopasaka og reklamo sa pormal nga hawanan sa korte aron matuki ang kamatuoran.

Apan sa pikas bahin, angay usab nga matuki kon nganong namugos ang grupo sa pagsulod sa dapit nga gipaubos sa higpit nga seguridad tungod sa presensiya sa mga lider sa kanasoran sa kalibotan. Ang kapulisan nihatag og “maximum tolerance” sa mga militante sa paghimo og kalihokan atol sa summit.

Dakong responsibilidad sa kagamhanan ni Presidente Rodrigo Duterte sa pagpanalipod sa mga inilang bisita, sama sa atong mga bisita sa atong yanong panimalay.