Don’t go away
Mikupot ko sa bukton ni Xander. Nagyaka mi sa balas sa baybayon nga duol ra sa among gipuyan sa lungsod sa Ginatilan. Sunday niadtong adlawa. Silingan ra mi. Ordinaryo lang namo ang pagkuptanay sa kamot. Morag wa kini malisya namo. Since sa among childhood moments, puwerte gyud namong suora.
Mao bitaw nga kanunay kong labanan ni Xander ko awayon ko.
“Nganong biyaan man ko nimo, uy? Kinsa pa may molaban nako kon dunay mangaway nako?”
Na, kaayo na gyung ibakho, uy. Nagsige kog pamahid sa akong mga luha sa akong palad. Giagbayan ko ni Xander.
“Dako ka na, Paula. Wa nay mangaway nimo. Aw, duna nuoy mangulitawo nimo.”
Mikatawa si Xander. Gikusi ko siyag hinay sa iyang kilid.
“Katawa ka lang, no? Guol baya kaayo ko.”
“Sus na siya. Morag asa ko paingon. Anhi ra ko sa Pilipinas, uy. Magkita ra gihapon ta someday.”
“Mingawon gyud ko nimo, Xander.”
Wa na ko maghilak apan nagsige kog hingus-hingos.
“Mao sab ko, uy, Paula. Pero ambisyon man gyud ni nako. Angay ka pa ganing malipay kay matagaan og katumanan ang akong gusto. You know
kaniadto pa.” Mao gyuy ambisyon ni Xander nga magsundalo. Puwete niyang lipaya dihang nakapasar siya sa eksamin sa Philipppine Miltary Academy. Maong moadto siya sa Bagiuo ugma diin tua didto mahimutang ang maong eskuwelahan.
“Bitaw, no? Angay tuod kong malipay? Pero di sab nimo kapugngan nga maguol ko.”
“Magteksanay lang gud ta kon may panahon ta, Paula.”
Igo na lang kong mitando. Sagunson kong nanghupaw. Di gyud kapugngan nga magkalagyo mi si Xander. Angay na lang gyud nakong dawaton ning tanan. Unsaon, gusto man gyung mosilbi si Xander sa nasod.
Milabay ang mga adlaw. Inanay kong naka- move on sa among panaglagyo ni Xander. Sa siyudad na sab ko nag-estar kay nag-eskuwela na man ko sa first year college. Di ko ganahang mopauli sa Ginatilan kay di ko gustong makahinumdom kanunay kang Xander. Kon makita gani ang lugar nga kanunay namong suroyan ni Xander, mahandom dayon nako siya. Mosakit ang akong dughan.
Mao nga panagsa ra kong mopauli sa Ginatilan. Mao untay gusto sa akong mga ginikanan nga every weekend ko mopauli sa among lugar. (SUMPAYAN)