MIKE, MGA MAYOR SA NARCO LIST GI-BAN SA PDP-LABAN

APAN KANHI MAYOR, 2 KA KONSEHAL DI MANAMBONG SA OATHTAKING

Mga mayor ug ubang mga opisyal sa kagamhanan nga lakip sa listahan sa narco politicians ni Presidente Rodrigo Duterte gi-ban sa pagtambong sa mass oath-taking sa Partido Demokratikong Pilipinong Bayan (PDP-Laban) ugma, matod ni Nixon Dizon, presidente sa partido sa Cebu Province.

“Inasmuch as we want to welcome everyone into the fold, there are party rules to follow, particularly in terms of recruitment and membership. The best way for these personalities who are in the “Duterte list” is to clear their names first before they can participate with any party activities, such as mass oath taking and rallies,” siya nagkanayon sa usa ka pamahayag.

Si kanhi mayor Michael Rama gitumbok ni Duterte nga protector ug hangtod karon, wa pa tangtanga sa Presidente ang iyang ngalan.

Sa laing press statement, si Bisaya Na Pud Movement co-founder ug president Mike Pato niingon nga dunay way giklarong pagdili sa pagpanumpa aron magpasakop sa PDP-Laban batok sa mga mayor ug indibidwal nga naa sa listahan sa presidente ug kinahanglan kining tahuron.

Mga sinaligang kauban ni Duterte sa partido nga naglakip kanila ni House Speaker Pantaleon Alvarez ug Senate President Aquilino Pimentel III mangulo sa kadagkuan sa PDP-Laban nga maoy mopapanumpa sa 50,000 ka bagong mga miyembro, nga naglakip sa mga municipal ug city mayors sa lalawigan sa Sugbo.

Sa wa pa ang pagpahibawo, si Rama niingon nga di siya manumpa sa PDP-Laban bisan kon kadaghanan sa iyang mga kaalyado nanambong.

Si Rama niingon nga wa siya imbitara sa pulitikanhong grupo ni Duterte apan siya malipayon nga sagad mga konsehal sa Barug Team Rama mangapil. “I thank the PDP-Laban hierarchy that they have chosen Barug Team Rama family to be affiliated (with them). It is so good to hear it’s not the party of our opponent that will be joining this coming Friday,” sulti niya sa mga reporter.

Si Rama niingon nga mao na kini ang iyang baruganan sukad pa kaniadto nga di siya manumpa sa mao nga partido samtang siya naninguha nga tangtangon siya sa listahan ni Duterte.

Gawas kang Rama, si Daanbantayan Mayor Vicente Loot gilakip sa listahan.

Bag-o ra usab nga gitangtangan sa iyang police power si Ronda Mayor Marianito Blanco III tungod sa giingong kalambigitan sa illegal drugs.

Ang tulo pulos nanghimakak nga duna silay kalambigitan sa illegal drugs.

Gawas kang Rama, di motambong sila si Konsehal Jun Alcover ug Edu Rama.

Si Alcover kritiko na ni Duterte bisan wa pa siya mapili nga opisyal sa Siyudad.

Si Konsehal Raymond Garcia, pangulo sa PDP-Laban sa Cebu City, nagkanayon nga pagasugdan ang programa alas 2 sa hapon karong Nobyembre 17.

Si Kapitan Phillip Zafra sa barangay Tisa ug presidente sa Association of Barangay Councils, nagkanayon nga gusto nga motapon ang mga barangay

officials ngadto sa PDP Laban sanglit ilang nagustohan ug nasubay sa ilang kagustohan ang gipatuman nga polisiya ni Duterte sama sa pakigbatok sa krimen ug giyera batok sa ginadiling drugas.

Si Rama nagkanayon iyang gitugotan ang labing daghan 65 ka mga barangay kapitan sa siyudad nga ilang kaalyado uban sa gatusan ka barangay konsehal sanglit ang ilang gitanmao ang kaayuhan sa dakbayan.

Samtang elected officials sa kagamhanan sa dakbayan sa Lapu-Lapu motambong sa mass oath taking sa PDP Laban.

Si Mayor Paz Radaza maoy mangulo sa konseho sa Lapu-Lapu sa ilang pagtambong.

“Kami sa city naka-sworn in nami,” pulong ni Radaza ngadto sa mga tigbalita. /