PAMILYA NANGITA OG HUSTISYASA AGENT NGA GITIPI

Nangita og hustisya ang pamilya sa 30 anyos nga call center agent nga napalgan nalang nga way kinabuhi nga nag-utawutaw sa kadagatan sa siyudad sa Lapu-Lapu niadtong Nobiyembre 7 nang hinaot nga masulbad ang kamatayon sa ilang igsuon.

Hustisya ang gihangyo karon ni Lyrma Aldemita, 57, taga Sitio Avocado, Barangay Lahug, siyudad sa Sugbo sa kamatayon sa iyang anak lalake nga si Edyl, 30.

Matod ni Nerma nga buotan ang iyang anak gani mao ni ang iyang gisaligan sa pinansyal nga aspeto lakip na ang pagsuporta sa tambal sa iyang bana nga masakiton.

“Hustisya lang ang akong gipangita sa akong anak kun kinsa man intawon ang nagbuhat o naunsa man gyud siya mahibaw-an lang namo, tanang mga santos ako nang nasangpit,” matod ni Nerma.

Katapusan nga nakit-an si Edyl niadtong Nobiyembre 1 sa buntag Adlaw sa mga Santos nga nananghid nga moadto sa sam-ang sa Calamba aron managkot.

Misaad ni nga mobalik dayon kay duna kini duty sa iyang trabahoan pagka alas 3 sa hapon ug sukad niadto wa na kini mopauli.

Nakadawat nalang og kasayu- ran ang mga igsuong babaye sa biktima nga dunay lawas sa usa ka lalake nga naglutawlutaw sa kadagatan sa siyudad sa Lapulapu nga wa nay kinabuhi ug miburot na.

Matod ni Babielyn ug Zap Aldemita mga manghod sa biktima nga nailhan nila ang lawas sa ilang igsuon nga namissing tungod sa tattoo sa lawas niini sa likod ug ang mga timailhan nga kini si Edyl.

Sa medical certificate nga gipakita sa pamilya nasuta nga namatay sa pagkalumos si Edyl apan dunay mga bun-og ang likod niini nga gituohan nga gikulata kini sa wa pa gitambog sa dagat.

Gusto nilang masubay kinsa ang gikauban sa ilang maguwang sa dihang mibiya kini sa ilang panimay pinaagi sa pagsusi sa mga CCCTV camera sa dapit diin posibling giadtoan.

Apan ang CCTV camera sa Barangay Lahug wa nila kini makita sanglit wa na sa recording ang kuha sa ilang video niadtong Nobiyembre 1.

Sakop sa Alpha Kappa Rho si Edyl apan gipahibawo sa mga igsuon niini nga way kontra ang ilang maguwang sa ilang dapit.

Usa sa ilang mga ig-agaw ang nagpadala og mensahe sa Facebook usa ka adlaw sa wa pa makit-i ang lawas ni Edyl nagpakita kini sa iyang damgo nga naputos sa bun-og ang kalawasan.

Tungod niini dako ang pagtuo sa pamilya nga gitabangan og kulata ang ilang igsuon ug gilabay lang kini sa dagat nga maoy hinungdan sa iyang kamatayon.

Awhag ni Babielyn sa iyang maguwang nga magpadamgo kini kanila ug mosulti kinsa ang nagpatay kaniya.

“Magpadamgo lang unta siya sir kausa kun kinsa ang naghimo,” matod ni Babielyn.

Awhag sa pamilya sa mga tawo nga dunay kasayuran sa kamatayon ni Edyl Aldemita nga mohatag og impormasyon sa kapulisan alang sa kasulbaran sa kamatayon sa ilang igsuon. /