JG Summit suportahan sa Team Rama
Paluyohan sa Team Rama ang gipadayag ni Mayor Tomas Osmeña nga unsolicited proposal sa JG Summit Inc., kinsa mobubo og P18 bilyones nga puhonan sa walo ka ektaryang luna sa Kawit island sa South Road Properties (SRP).
Si kanhi mayor Michael Rama nagkanayon nga di babag ang Team Rama sa kalambuan sa dakbayan sukwahi sa gipasiatab ni Osmeña nga pulos ra pagsupak sa iyang mga programa.
“The direction of Barug Team Rama (is) we will never be an obstructionist. We have always been open-minded, we are not closed because we love
our city,” padayag ni Rama atol sa press conference kagahapon.
Ang Team Rama sa konseho nisuporta sa land swap deal tali sa Kapitolyo, P716 supplemental budget, P110,000 matag metro kwadrado nga pagbaligya sa tulo ka ektaryang luna sa SRP ug ang P6.2 bilyones nga annual budget.
Apan gipabuhagay ni Rama. kinsa maoy nagbaligya sa 26 ektaryas sa SRP nga nahalin og P16 bilyones ngadto sa tulo ka dagkong developer, nga labing maayo ang public bidding ang subayon inay sa unsolicited proposal nga maoy gusto sa JG Summit.
Matod ni Rama nga bintaha kanunay ang City Government sa public bidding diin iyang gihulagway nga taas ang proseso.
Iyang gisaysay ug gipahinumdom ang panultihon kaniadto ni anhing George Rama nga ang SRP di South Road Properties kon di ‘Solo Ra Pangwarta’ dihang unang nitanyag ang SM Prime Holdings Inc. sa ilang unsolicited proposal niadtong tuig 2009 nga mao karon ang gitukoran sa SM Seaside City.
Ang JG Summit gusto nga mopalambo sa Kawit island, nga kanhi propiedad sa Department Health apan napanag-iya sa siyudad human sa panagbaylo sa yuta apan wa pa matino kon nabalhin naba ang titulo pabor sa City Hall.
Gipadayag ni Osmeña nga moabang ang JG Summit og 10 ngadto sa 15 porsiyento sud sa 50 ka tuig depende sa kinatibuk-ang kita sa “Isla de la Victoria” nga maoy gustong ipangan ni Osmeña sa lugar.
Kon kini mahinayon, gihulagway ni Osmeña nga makapasaka kini og dako sa presyo sa yuta sa SRP.