Unfair sa Angkas

Dili maki-angayon kining giluwatan nga kamanduan sa Land Transportation Franchising and Regulatory Board (LTFRB) nga mao ang pagpanakop sa mga Angkas drivers/operators. Tinuod nga ubos sa balaod illegal ang single motorcycle nga mamasahero kay wa man kini prankisa, pero nganong ang Angkas ra man ang ilang dakpon ug dili man nila iapil ang habal-habal nga namasahero man sab ni?

Si Ahmed Cuizon, ang Regional Director sa LTFRB 7, mipasabot nga ang Angkas susama og sistema sa Uber ug Grab nga usa na ka Transportation Network Company nga mag-gamit og application sa mga smart phones.

Ug tungod niini, matod niya, ubos na kini sa ilang jurisdiction ug ang habal-habal kuno, ang Land Transportation Office (LTO) mao nay dunay responsabilidad niini.

Kining maong pamahayag nagdugang na hinuon og kalibog sa publiko. Nganong manakop man lagi sila og kolurom nga mga van nga sama sa habal-habal wa man sab nay prankisa apan namasahero. Kon atong sakyan ang pamahayag ni Cuizon nga ang Angkas sama na sa Grab ug Uber, nganong di man sab ni nila hatagan og temporaryong pagtugot nga makabiyahi sama sa Grab ug Uber?

Ambot og unsay lohika sa LTFRB nga manakop sila og Angkas pero di sila modakop og habalhabal nga kon buot hunahunaon mas safety pa gani nga sakyan ang Angkas kay sa habal-habal.

Kini tungod kay giagi kini og makuti nga seminar, gipasumiter og biodata, resume, rehistro sa motor, police clearance ug makaila pa dayon ang pasahero sa driver.

Sa habal-habal, daghan ang abusado. Magpatuyang og pataas sa pletihan, magyaga-yaga pa sa pasahero ug labaw sa tanan dunay mga nagmaneho nga way lisensiya ug way rehistro ang motorsiklo. Mao unta ni angay unahon sa LTFRB ug LTO. Asa man ang kaangayan? Di ba double-standard man ni?