Maorag batan-on
Dear Noy Kulas,
Tawga lang ko og Xenia, edaran na pero batan-on og kasingkasing. Biyuda na ko for five years.
Naa koy duha ka uyab karon nga nakapalibog nako og maayo. Kining usa akong classmate sa elementary ug high school nga biyudo na for 10 years. Nikompisal siya nako nga sukad pa sa una nakagusto na siya nako pero maglisod kuno siya og kab-ot nako kay siya yuta samtang ako langit. Ako siyang gisugot kay di magpabalibad. Gihasulan na ko sa sige niyang panguyab. Sa laktod, napugos ra ko.
Kining ikaduha kauban nako sa gym. Manghod nako siya og 20 years, ulitawo ug stable og trabaho. Ambot, Noy, ganahan kaayo ko niya mao nga wa ko kabalibad, naay nahitabo namo ug nasundan pa sa makadaghan. Akong nakita seryuso siya kay usahay grabe magselos unya ganahan siya og public display of affection. Ang akong mga amiga nasuya gani kay nakaigo pa og batan on.
Ang biyudo wa makahibawo sa akong laing relationship while kining batan on nakahibawo. Pero naproblema ko kay ang duha pulos na gustong makigpuyo nako. Naglibog ko kay basin unsay ikasulti sa mga tawo labina sa akong mga anak nako kon ako ni silang uyonan. Okay ra unta ko sa present situation nako. Unsa kahay mahitabo kon akong uyonan ang usa nila while ang usa akong buwagan? Please tambagi ko. Daghang salamat. XENIA
Xenia,
Kinahanglan diay nga magpili ka nila? Unya puyo ra sab sila kutob? Hinuon, basin wa na lang ninyo huna-hunaa ang magminyo kay biyuda ka man ug edaran na.
Kon mahibaw-an na sa biyudo ang imong lain nga relasyon, basin unsay iyang buhaton ninyong duha. Kana maoy sulbaron nimo og una. Kon wa kay gugma sa biyudo, pasabta ug prangkahi siya bisan masakitan siya. It is for your own good. Unsay makalipay nimo, kana maoy buhata kay alangman na nimo. Ayaw buhata ang paglipay niya samtang ikaw mag-antos uban niya kay wa kay gugma. Ikaw ang responsable sa imong kaugalingong kalipay.
Kon nakahibawo ang imong mga anak sa imong relasyon nianang batan-on ug wa silay pagsupak kon makigpuyo ka, kana maoy basihi sa imong desisyon. Kon di sila uyon kay mauwaw sila, imo usab ning ikonsiderar ang ilang baruganan. Kay in the end, kon matiguwang ka na, sila ang labing unang tawo nga imong masandigan. Busa, importante kon imo silang konsultahon sa imong desisyon.