Don’t go away
Nalingaw man sab nuon ko sa bag-o kong mga friends, sa eskol ug sa gipuy-an kong boarding house. Gani, nasuod ko man si Nestor nga nagpuyo sa pikas door. Two door apartment ang boarding house nga akong gipuy-an. Ang usa ka door para namong mga girls, ug ang pikas door para sa mga lalaki. Taga Catmon si Nestor. Usa ra ka university ang among gitunghaan.
Kanunay ming magkakuyog si Nestor sa pagpaingon sa among gieskuwelahan. Nuon, sa pagpauli, di mi magkakuyog kay lain-lain man ang oras sa among paggawas, ug lainlain sab ang kurso nga among gikuha.
“You know, Paula, karon lang gyud ko mobatig komportable nimo. I mean, karon pa gyud ko makakitag friend nga nagtan-aw nako nga iya gyud kong friend.”
“Wa man ko kasabot anang imong giingon, uy, Nes.”
Nagduwa-duwa kog game sa akong selpon samtang nanglingkod mi si Nestor sa lagwerta sa among gipuy-an. Sunday niadtong adlawa. Di man ko mogawas sa balay kon way klase.
“Kuan man gud, kanunay kong yaga-yagaan sa giisip kong mga friends. Unsaon man gud, anak lang kog pinaangkan. Unya kataw-an ko nila.”
Mihunong kog duwa-duwa sa akong selpon. Mitan-aw kog dugay kang Nestor nga guol ang nawong. Nahunahuna ko sab ang akong kaugalingon.
“Parehas diay ta, Nes. Ako sab kaniadto, kanunay sulugsa akong mga klasmet ug friends. Sip-unon man gud ko. Unya daot pa gyud.”
“Pero di na man karon, di ba, Paula. Guwapa ug seksi ka na.”
Nabatyagan ko ang pagpamuwa sa akong nawong. Nakalitan ko sa gisulti ni Nestor.
“Thanks sa pagdayeg, ha, Nes.” Unya nindot kaayo kog pinahiyoman.
Sukad niadtong adlawa, di na kaayo ko maghunahuna kang Xander. Si Nestor ang nakatabang nako aron di na ko mingawon kang Xander. Usa ka gabii nga nangaon mi sa gawas si Nestor, sa among pagpauli dunay lalaki nga miduol nako.
“Kaguwapa gyud nimo, Miss, uy. Pahagka ko, bi.”
Wa ko makalihok ug nahadlok ko. Gibadlong ni Nestor ang lalaki.
“Bay, ang babaye di bugal-bugalan, kondi panggaon.”
Isog nga miatubang ang lalaki kang Nestor. Ug sa kalit gisumbag niya si Nestor. Nakasinggit ko sa kahadlok. Apan nakalihay si Nestor. Ug dali ra siyang nakabawos sa pagsumbag sa lalaki. (SUMPAYAN)