Pitik sa bidlisiw
Ingon-ingon nga wa na siyay nakita. Usa ka lapad nga blangko nga way ilhanan. Dugay na siyang natislaob sa kinatumyan sa kahilom. Siya mismo wa na gani makaila sa mga butang nga nagliyok kaniya. Nalibog siya sa iyang kaugalingon. Di na siya ganahan molingi pa aron pagsusi sa kasaba ug kamingaw.
Apan tawo pa siya ug di mahitabo nga usa ka mananap. May mga tiil pa siya nga molakang. Mga kamot nga mokab-ot sa bisan unsa nga mohatag niyag kaibog. Apan wa na gayud molihok ang pagtuo nga siya malipay pa. Mora siyag gigapos ug gibutang sa usa ka kahimtang nga lisod tugkaron.
“Ayaw kalibog. Emilio, hunahunaa lang nga naa pa ang paglaom. Hinumdomi kanunay nga may dako pang purohan si bisan kinsa nga moangkog kalipay. Sabta lang ang imong kaugalingon.” Pahimumdom kaniya sa anghel niyang magbalantay.
Gitutokan ni Emilio karon ang kagabhion. Mibawos kini pagtutok kaniya sa bagtok nga pahimangno. Naghunghong ingon niini: “Usa ako ka misteryo nga di mo masukod. Tawo ka nga di angayng pasanayon kay wa kay bunga nga angayng ipasigarbo.”
Tuod may pagka husto ang tingog nga misunggal na sad sa uyok sa iyang kahiladman. Puol na kaayong paminawon, daw sudya sa kinabuhi nga way bili. Kadaghan na siyang mosuway paglugti sa bukog sa iyang kinabuhi, apan kanunayng mapakgang sa iyang anghel nga magbalantay nga maoy gikuyawan sa iyang gibuhat. Kinsay di kuyawan nga may maghikog sa imong atubangan?
Ning gabhiona di masaysay ang gibati niyang kabalaka. Tumaw na sad sa lapdos sa depresyon? Hain ang iyang anghel nga magbalantay? Di na sad siya masabtan -- duha na sad ang iyang hunahuna ug kaisipan, mao nang taas ang paghigmata nga mipupos sa kagabhion.
Karon nakahukom na siya. Puslan man nga gitalikdan siya sa kamatuoran sa anghel nga magbalantay milakang siya ngadto sa dapit sa bantaaw nga silangan.
Buot siyang motipas sa laing habig sa pikas nga kalibutan aron didto ipadayon ang kahugnoan sa kaugalingon. Apan sa kalit nalipong siya kay natusok sa wa damhang sidlit sa pitik sa bidlisiw sa banagbanag. Nakaamgo siya. Mibalik siya sa agi ug milakang ug milakang sa gaan nang mga tiil. (KATAPUSAN)