Taiheiyo miabag sa panginabuhi sa kababayen-an
Napatuman na ang taudtaud na’ng katuyuan sa usa ka kahugpungan sa kababayen-an sa San Fernando nga matanyagan ang ilang mga ginsakopan og panginabuhi-an pinaagi sa pagpanahi.
Gikan sa mga trapo nga gamitonon sa mga industriya ngadto na sa mga masul-ob sama sa mga uniporme sa pagpanungha, pagpanrabaho ug pagpanuwa ug i mga sinina nga mabaligya sa mga tindahan maoy himoon sa Rural Improvement Club (RIC).
Kini natuman human mitanyag ang Taiheiyo Cement Philippines, Inc. (TCPI) sa hangyo sa RIC nga masangkapan sila og lima ka mga dekoryenteng makinilya sa Sewing Livelihood Program.
Gipaagi kini sa TCPI sa usa ka tripartite memorandum of agreement (MOA) tali sa Barangay Panadtaran ug sa RIC, organisasyong giila sa barangay ug sa Municipality of San Fernando - Department of Agriculture.
Mitimaan si Vanessa N. Bongcawil, community relations and general affairs section head, alang sa TCPI uban ni kapitan Ricardo Y. Reluya ug sa pangulo sa RIC nga si Estela A. Omaque.
Gipili sa kompanya ang dekalidad ug tukma nga Hoseki sewing machines nga ginama sa Japan alang sa proyekto harun maseguro ang pagkamalungtaron sa programa.
Gitunol sa TCPI ang mga ekipo atol sa paglusad sa proyekto ni’ng bag-o pa lang didto sa Panadtaran Barangay Hall uban nilang konsehal Gaudioso Amad, Rodulfo Guia, Catalino Baysa, Eduard Natividad ug Ross Karina Tanudra.
“Makatabang (kini) sa atong mga kababayen-an. Dako kaayo ni’ng maka-abag sa atoang panginabuhi, sa pagsugod sa pag-angat sa atoang panginabuhian,” mipadangat si Reluya sa iyang mensahe.
Agi’g tubag, giawhag ni Bongcawil ang RIC nga alimaha’g maayo ang mga makinilya ug gamiton ang maong mga ekipo sa hingpit nga mapatuman gyud ang katuyuan sa programa sa kalungtaran ug mapuslan nga sila maproduktibo.
“Nanghinaot kami nga masustain ni nga livelihood program ug dili masayang ang gipundar sa kompanya sa Taiheiyo para mapun-an ang inyong panginabuhian ug molambo ang barangay,” matod niya.