PROBLEMA SA PBA WA PA MASULBAD
Mibalik sa nasod ang Philippine Basketball Association (PBA) board nga aduna gihapo’y problema nga sama sa ilang giatubang sa ilang paggikan paingon sa Los Angeles, USA, lima na ka mga adlaw ang nakalabay.
Wala gihapon masulbad ang kaguliyang kabahin sa liderato sa PBA gumikan kay wala nadayon ang tinuig nga planning session sa board sa Sofitel Hotel sa Los Angeles.
Kini gumikan kay upat sa mga sakop sa board ang wala motunga sa gikatakda untang panagtigom lakip na ang umaabot nga chairman nga si Ramoncito Fernandez sa NLEX Road Warriors.
Si Fernandez mao unta ang mangulo sa panaghugpong apan wala kini nitunga gumikan sa kadaghan sa iyang gimbuhaton kabahin sa negosyo.
Ang ubang wala ningtunga mao sila si Patrick Gregorio ug Ricky Vargas sa Talk N’ Text KaTropa, Atty. Raymund Zorilla sa Phoenix Fuel Masters, ug Al Panlilio sa Meralco Bolts.
Gumikan niini, nagpabiling wala buwag ang baruganan sa board kabahin sa isyu kon angayan na bang taktakon si commissioner Chito Narvasa.
Ang mayorihiya sa board nga adunay pito ka mga sakop nga gipangulohan ni Manny V. Pangilinan, tag-iya sa Talk N’ Text, Meralco ug NLEX, ang nagtinguha nga palagpot sa puwesto si Narvasa, samtang ang laing lima nga gipangulohan sa San Miguel Corp. ang mingdapig kang Narvasa.
Tungod kay wala ma’y panagtigom nga nahitabo, nagsilbe na lang nga bakasyon alang sa board ang ilang biyahe sa Amerika.
Ang pamilya sa mga sakop sa board nga ningkuyog sa biyahe ningtan-aw og The Ellen DeGeneres Show.
Taliwala sa problema sa liderato, ang bag-uhay lang nahuman nga Governor’s Cup makonsiderar nga dakong kalampusan human kini nakaabot ang kita niini sa P200-million mark.
Nakatampo og dako niini ang championship series tali sa Brgy. Ginebra Gin Kings ug MEralco Molts nga miabot sa deciding Game 7.
Ang katapusang tulo ka mga duwa sa series nakaposte og rekord nga 144,173 ka mga tumatan-aw sa 55,000-capacity Philippine Arena sa Bulacan.
Ang deciding Game 7 diin mingdaog ang Gin Kings, 9186, mitali sab og rekord nga 54,086 ka mga tumatan-aw sa usa lang ka duwa.