McGregor gihagit ni De La Hoya

Masaligon si boxing Hall of Famer Oscar De La Hoya nga bisan sa iyang edad nga 44, aduna pa siya’y ikabuga sa kalibutan sa boksing.

Si De La Hoya, kinsa miretiro hapit dekada na ang nakalabay, sekreto nga nag-training ug iyang gihagit si mixed martial arts (MMA) superstar Conor McGregor. “You know I’m competitive,” batbat ni De La Hoya sa interbyu sa Golden Boy Radio.

Gipabuhagay ni De La Hoya nga magkinahanglan ra siya og duha ka rounds aron pakamangon si McGregor.

“I still have it in me. ... I’m faster than ever and stronger than ever. I know I can take out Conor McGregor in two rounds. I’ll come back for that fight. Two rounds. Just one more ( fight). I’m calling him out. Two rounds, that’s all I need. That’s all I’m going to say.”

Niadtong 2015, naglaraw untang mobalik og away si De La Hoya apan nausab ra ang dagan sa iyang hunahuna.

Ang 1992 Olympic gold medal winner nga si De La Hoya nahimong world champion sa unom ka mga weight division ug kini sa 130, 135, 140, 147, 154 ug 160 pounds.

Ningdaog si De La Hoya og dagkong mga away batok sa Hall of Famers nga sila si Julio Cesar Chavez Sr. (kaduha), Pernell Whitaker ug Arturo Gatti.

Gikaharong sab ni De La Hoya ang superstars nga sila si Felix Trinidad, Hector Camacho Sr., Bernard Hopkins, Floyd Mayweather Jr., Shane Mosley (kaduha) ug Manny Pacquiao.

Sukad sa iyang 8th round TKO nga kapildihan batok kang Pacquiao niadtong Disyembre 6, 2008, si De La Hoya wala na sukad miaway og balik.

Si McGregor, kinsa gilupig ni Mayweather pinaagi sa unanimous decision sa labing una niyang away professional boxer, wala pa mipagawas og pamahayag kabahin sa hagit ni De La Hoya.