Insentibo sa Cebu athletes giaprubahan sa konseho
Naaparubahan na sa konseho sa dakbayan sa Sugbo ang resolusyon ni councilor Jerry Guardo nga maghatag og insentibo sa mga atleta sa dakbayan nga makalangkat og medalya
sa nagkalainlaing international events.
Basi sa resulosyon ni Guardo, deputy mayor for sports sa konseho, ang atleta nga makadawat niini kinahanglang usa ka Filipino citizen, kinahanglang residente sa dakbayan o kaha bisan kinsa sa iyang mga ginikanan, ug kinahanglang wala’y dautan nga rekord.
Makakuha lang ang insentibo kon ang atleta adunay certificates gikan sa Philippine Sports Commission (PSC) o Philippine Olympic Committee ug opisyal nga resulta gikan sa tournament organizers. “I am happy that my proposed ordinance was finally approved by the council as this will help motivate the athletes to aspire more. These Cebuano athletes deserved to be given reward and recognition for bringing home pride and honor to us Cebuanos,” matod pa ni Guardo.
Ang madawat nga insentibo nagdepende sa klase sa medalya ug kalidad sa gisalmutang kompetisyon sa atleta.
Sa Olympic Games lakip na niini ang Summer Olympics ug Paralympics, ang gold medal winner makadawat og P1 million nga insentibo, ang silver medalist makabulsa og P500,000 samtang ang bronze medalist makakuha og P300,000.
Sa Asian Games lakip na niini ang Asian Paralympic, ang gold nagbalor og P300,000, ang silver kay P200,000 samtang ang bronze kay P100,000.
Samtang sa Southeast Asian Games lakip na niini ang SEA Paralympic Games, ang gold nagkantidad og P100,000, ang silver kay P50,000 samtang ang
bronze kay P25,000.