13 KA SAGUNSON NGA KADAUGAN
Nagmaskara nga si Irving nangulo na sab sa Celtics
Mibalik si Kyrie Irving nga nagmaskara ug nimugna kini og 25 puntos aron pangulohan ang Boston Celtics sa pagpukan sa Brooklyn Nets, 109-102, nga nag-inat sa ilang sunodsunod nga kadaugan sa National Basketball Association (NBA) ngadto sa 13 kagahapon.
Si Irving wala nakapakita og aksyon sa miaging duwa sa Celtics human aksidenteng nasikhan ang ilong niini sa iyang kauban nga si Aron Baynes niadtong Sabado. Naliki og gamay ang bukog sa iyang nawong.
Apan sa iyang pagbalik, wala nagpaapekto si Irving sa iyang angol gamit ang protective mask. Nakadawat sab og saktong suporta si Irving gikan sa iyang mga kauban.
Si Marcus Morris nitampo og 21 puntos ug 10 rebounds alang sa Celtics, nidugang og 19 puntos si Jayson Tatum samtang niamot og 17 puntos si Al Horford. Ang Celtics aduna na’y 13-2 nga rekord.
Bisan kinsa, hasulan mogamit og protective mask apan sa habig ni Irving, mura ra kini’g wala alang kaniya. Katapusang naggamit og
protective mask si Irving niadtong Disyembre 15, 2012 dihang nagduwa pa siya sa Cleveland Cavaliers. Niadtong higayuna, nimugna og 41 puntos si Irving.
Ang Nets, nga nahagbong sa 5-9 nga rekord, ningkombati nga wala ang ilang sinaligang
pointguard nga si D’Angelo Russell, kinsa adunay bun-og sa iyang tuhod.
Sa maayo nilang gipakita sa sayong bahin sa 2017-18 season, ang Celtics naghinamhinam na sa umaabot nilang pagpakigbatok sa defending
champions Golden State Warriors aron masukod kon asa kutob ang ilang ikabuga.
Sa labing unang higayon ning maong season, ang Celtics makigharong sa Warriors ugma (RP time).
“It’s definitely an incredible streak we’re on, and now comes the whole media frenzy of will the streak end, and what’s going
to happen on Thursday and the Golden State Warriors coming to Boston,” matod ni Irving.
“So I’m looking forward to all that hoopla.”
Human nakasikit pagbalik ang Nets, si Irving nakapuntos pinaagi sa iyang jumper sa nahabiling 3:40 minutos aron dugkatan ang pagsutoy og balik sa opensa sa Celtics ug ning higayuna, wala na sila motugot nga makapanghudlat pa ang Nets.
“The way that they converted on us in transition after our mistakes tonight, you can’t have that against Golden State. You just get blown out of the gym,” batbat ni Celtics coach Brad Stevens.
“We just have to play really solid on both ends and do what we do as well as we can and see where we stand.”
RAPTORS 129, ROCKETS 113
Sa Houston, nagpakatap og 27 puntos si DeMar DeRozan aron pangulohan ang kadaugan sa Toronto Raptors batok sa host Houston Rockets.
Ang Rockets gipangulohan ni James Harden pinaagi sa iyang 38 puntos lakip na niini ang perpektong 19 ka freethrows.
Sa hinapos nga bahin, nakabulhot ang opensa sa Raptors aron pagposte og dakong labaw, 116-103, nga maoy nakatiglom sa poruhan sa Rockets.
SPURS 97, MAVERICKS 91
Sa Dallas, nipupo og season-high nga 32 puntos si LaMarcis Aldridge aron pangulohan ang kadaugan sa San Antonio Spurs batok host Dallas Mavericks.
Ning duwaa, si Spurs coach Gregg Popovich nahimong NBA coach nga labing dali nga nakaabot og 500 ka mga daog sa mga duwa nga balwarte sa kontra.