MAANYAG ANG HALONG BAY

Liboan sa ka mga limestone rock formation ug mga gagmayng isla nga may talagsaong kanindot maoy mosugat kanimo sa pagtaak nimo sa Halong Bay sa nasud sa Vietnam.

Way makahubad sa kaanyag sa nabantog nga travel destination sa tibuok kalibutan.

Kini ang usa sa di angay nimong palabyon kon mobisita ka sa Vietnam.

Ang Halong Bay usa ka ka Unesco World Heritage Site sa may Quang Ninh Province sa

Vietnam. Kini maabot mga unom ka oras nga biyahe sa sakya kon gikan ka sa Hanoi. Sobra sa 1,500 ka mga limestone rock formation ug mga gagmayng isla sa nagkadaiyang porma ug gidak-on ang imong makita sa dapit.

Ang labing maayong pamaagi aron imong masud-ong ang kaanindot sa dapit mao ang pag- tour niini pinaagi sa cruise nga barko.

PAGPILI SA CRUISE

Magdepende sa imong budget ug oras ang pagpili og cruise nga moangay alang nimo o kon kuyog nimo imong mga higala ug pamilya. Aduna sab kay kapilian kon unsay gidak-on sa barko (kon mas dako nga barko, pasabot nga daghan kag makauban) nga maoy inyong sakyan sa pag-tour. Kon maghisgot og adlaw sa tour, mas maayo nga pilion nimo ang 3 days, 2 nights nga tour kaysa 1 o 2 ka adlaw nga tour.

Kalabot sa barko, kon mas gusto ka og pribado ang imong biyahe, mahimo kang mopili sa 2 person only nga barko, laing kapilian mao ang 6- guest, 20- guest ug 24- guest boat kon usa mo kadakong grupo nga mag- tour sa dapit.

Sa pagbisita sa Superbalita Cebu sa dapit, gipili ning manunulat ang 6- guest boat ug wa ko magmahay sa pag---

pili niini sanglit way samok ug di saba matag gabii.

Mas makadayeg ka sa kanindot sa Halong Bay kon mas dugay ang inyong tour ug kini mas sulit sa inyong bulsa.

Sa pagpangita og tour, mas maayo nga magpaabag mo og pa- book sa inyong gisak-an sa Hanoi o kon asa mo nagbase sa nasud.

MGA KALIHOKAN

Daghang mga kalihokan ang mahimo ninyo sa dapit gikan sa kayaking sa mga islet ug rock formation, swimming, cooking class, pangisda, pagbisita ug mga langub ug uban pa. Sa unang adlaw sa amoang tour, nag-kayaking una mi sa dapit usa mi nibisita sa Thein Can Son Cave.

Nag- barbeque mi sa white sand nga baybayon alang sa paniudto sa among ikaduhang adlaw. Human niini, nag-kayaking ug hiking mi sa mga gagmayng isla sa dapit.

Nibista mi sa Vun Vieng Fishing Village ug Pearl Farm sa among ikatulong adlaw sa wa pa mi nipauli pabalik sa Hanoi.

Sa among pag-uli gilingaw sab mi sa puppet show nga gidalit sa paghapit namo sa Yen Duc Village. /