Don’t go away

Maayong pagkaigo sa nawong sa lalaki sa pagsumbag ni Nestor. Nasarasay kini. Misamot ang gibati kong kahadlok. Duna diay duha ka kauban ang lalaki. Midasmag sila kang Nestor. Gitabangan nila si Nestor. Naluoy ko kang Nestor kay wa siyay daganan sa tulo niya ka mga kontra.

Unya, usa ka lalaki ang kalit nga nahiabot. Milaban siya kang Nestor. Mga kamot ug mga tiil ang iyang gigamit sa pagpakig-away sa tulo ka lalaki. Maayo siya sa karate. Wa ko makasabot sa akong gibati niadtong tungora. Si Greg ang maong lalaki. Nahiabot ang mga polis. Wa na makatindog ang tulo ka mga lalaki. Nagping-it sila sa kasakit.

“Kuyog mo namo kon moreklamo mo aning tulo!”

Gitan-aw mi sa usa ka polis. Upat sila. Nagkatinan-away mi si Nestor ug si Greg. Nanglingu-lingo ko. Di ko gustog samok. Nanglingu-lingo sab sila si Nestor ug Greg. Nakasabot ang mga polis. Dali nilang gikarga sa ang tulo ka mga lalaki. Dali kong miduol kang Greg.

“Sus, may gani miabot ka, Greg. Kon wa pa, unsa na kahay nahitabo namo ni Nestr ron. Salamat kaayo, ha.” patrol car Nawala na ang akong kahadlok.

“Diha man sab ko gikan. Nakita ta gani mong duha pero wa lang ko moduol ninyo.

Gitudlo ni Greg ang gikannamo ni Nestor. Unya gipaila-ila ko sila si Greg ug Nestor sa usag usa.

“Dugay na gyud tang wa magkita, uy, Greg.”

Taga Ginatilan sab sila si Greg, Mao bitaw nga nagkaklasmet mi sa elementarya sa among lugar. Apan paggradwar namo sa elementarya, dinhi na sila mamuyo sa siyudad, uban sa iyang mga ginikanan ug duha ka mga igsuon. Nakakita man gud og maayong trabaho ang Papa ni Greg dinhi. Ang iyang Mama sab nga usa ka public teacher, nabalhin dinhi sa siyudad.

“Bitaw, uy. Dako na gyug kausaban labi na gyud ka, Paula, nga wa dayon nako mailhi ganina. Ang kanhi sip-unon ug kanunay kong awayon kaniadto, karon guwapa ug nindot na sab og lawas.”

Sus, namatngonan ko kaayo, uy ang pag- blush sa akong nawong. Guwapa ug seksi gyud tingali ko kay gidayeg man sab ko ni Greg. Nahikatawa na lang ko nga mihapak og hinay sa bukton ni Greg. (SUMPAYAN)