CELTICS BATOK WARRIORS
Human sa 13 ka sunodsunod nga kadaugan, sagubangon sa Boston Celtics ang usa pinakalisod nga dalan ug babag sa ilang tinguha nga masumpayan ang nagkutay ug way putolputol nga pagpanaog.
Karong buntag, ikasangka sa Celtics, kinsa miharos sa ilang uwahing 13 ka duwa human sa duha ka pilid, ang defending
champion Golden State Warriors ipahigayon diha mismo sa korte Sa Celtics nga ang mao ang TD Garden.
Ang duha ka koponan mao karon ang nag-una sa ilang division diin ang Boston naghupot og 13-2 nga baraha alang sa Eastern Conference samtang ang Warriors nga labas pa usab sa ilang uwahing pito ka sunodsunod nga kadaugan mitali og 11-3 nga record. Ning sayo pa lang nga bahin sa 2017-18 season, nalantawan nga nihinayhinay og turok ang ilang hugot nga panagribal. Sa kasaysayan, sa 336 nila ka duwa sa regular season, ang Boston Celtics ang naglabaw sa daog nga may 201 samtang ang Golden State mitali og 135 ka daog. Sa duha nila ka duwa sa niaging tuig, tabla ang ilang standing. Midaog ang Warriors, 10488, niadtong Nobiyembre 18, apan gibawsan kini niadtong Marso 8, 99-86. Ning tuiga, ang Boston daw sa nakakita og saktong kombinasyon sa mga players nga gipangulohan ni Kyrie Irving kinsa ilang nakuha gikan sa Cleveland Cavaliers. Nabitik unta usab nila ang laing pambato nga si Gordon Hayward sa Utah Jazz apan sa wala damha gisugat kini og dakong pagkaangol ug posibling dili pa kini makaduwa sa tibuok season.
Apan bisan pa man niini, wa kapugngi ang nagpungasi nga pagpangutlo og kadaugan sa Celtics ug nakapahimo kanilang unang team sa NBA nga mipugnit og 13 ka way putol nga kadaugan human sa duha ka kapildihan.
Gawas ni Irving, ang presensiya ni Jaylen Brown ug sa beteranong si Al Horford maoy laing lig-ong puwersa sa Celtics nga gituohang maoy mangulo sa pagdala og balik sa Boston ngadto sa finals. “I’m sure that people are going to float that around,” matod ni Horford . “But we understand we have a long ways to go. And it still is only November.”
Si coach Brad Stevens nagkanayon nga ang iyang gihatagan karon og ig-- ong pagtagad mao ang pagkorehiir sa pipila ka mga sayop nga ilang nakita kagahapon sa video study ug walkthrough
session kagahapon.
“Otherwise, we’ll really get exposed,” ingon ni Stevens. “There’s a reason why they haven’t played a lot of close games. And it’s because they’re awfully freaking good.”
Apan si coach Steve Kerr sa Golden State nakadayeg sa uwahing gipakita sa Boston. “They’re motivated,” ingon ni Kerr. “This is a team that’s been on the rise the last couple of years... They want to win a championship. And it looks like it.”
Ingon niya nga iyang gikalipay ang oportunidad nga sa sayo ning season nakita gilayon niya ang mga lig-on ug potensiyal nga mga kontra gikan sa Eastern Conference ug nagtuo siya nga ang Boston maoy usa sa umaabot nga team. “It sure looks like Boston is the team of the future in the East,” matod ni Kerr. “That looks like a team that is gonna be at the top of the East for a long time. Whether their time is now or in the future, that’s to be determined.” / JBM