MOCHA GITUBOY PAGKA SENADOR
GIPAHIBAWO ATOL SA PDP LABAN OATH-TAKING
Wala magdahom si Communications Undersecretary Margaux “Mocha” Uson dihang gianunsiyo siya ni House Speaker Pantaleon Alvarez isip usa sa ilang lineup pagkasenador sa 2019 sa Partido Demokratiko Pilipino - Lakas ng Bayan (PDP-Laban) kagahapon atol sa mass
oathtaking sa bag-ong mga miyembro sa partido sa Plaza Independencia.
Lakip sa gianunsiyo ni Alvarez sila si Presidential Spokesperson Harry Roque, kanhi pangu sa Metro Manila Development Authority (MMDA) Francis Tolentino, ug tulo ka congressman--Karlo Nograles sa Davao, Geraldine Roman sa Bataan ug Alfredo Benitez sa Negros Occidental.
Matod ni Uson nga dugay na siya nga gidapit ni Alvarez nga modagan pagkasenador apan wa siya’y plano.
“Kaya nagulat po ako ng sinasabi nila na inanunsyo raw po ni Speaker Alvarez na ako ay tatakbo bilang senador. Hindi ko po ito alam at hindi namin ito pinag-usapan,” matod ni Uson.
Mapasalamaton siya apan sa pagkakaron, pabilin ang iyang plano nga dili modagan, “At kung tatakbo man po ako, eto po ay dahil si Pangulong Duterte na mismo ang nagpatakbo sa akin.”
Ang unom ningtambong sa PDP-Laban oathtaking kagahapon atubangan sa kapin 50,000 ka mga Sugboanon nga supporters ni Duterte sa nagkadaiyang parte sa Sugbo.
Si Tolentino gitudlo ni Duterte isip iyang political adviser niadtong Hulyo.
Samtang si Roque, kaniadto representante sa Kabayan Partylist mao na karon ang tigpamaba sa Presidente.
Si Roman sa iyang bahin mao ang labing una nga transgender woman sa nasod nga nahimong kongresista.
Giisip usab nga “one of the most powerful congressmen,” si Nograles ni Duterte kinsa Davao City 1st district respresentative. Si Benitez, third district congressman sa Negros Occidental, niadto pa nga gianunsiyo ni Alvarez nga lakip sa senatorial lineup alang sa PDP-Laban sa 2019. Gihangyo ni Alvarez ang tanang mga Sugboanon nga anaa atol sa maong rally nga suportaran ang unang line-up ug himuong 12-0 ang resulta sa piniliay agi’g suporta usab ni Duterte.
MIKE GIDASIG
“Keep trying.”
Si Alvarez nagdasig kang kanhi Cebu City Mayor Mike Rama aron mahinabi si Duterte ug malimpyohan ang iyang pangan sa gidudahang mga narco-politician.
Karon pa lang, nipasidaan na siyanga tangtangon isip mga miyembro sa PDP-Laban ang mga opisyal nga nakapanumpa isip bag-ong mga sakop kagahapon kon apil sila sa listahan sa narco-politicians ni Duterte.
“Naa koy listahan pero dili lang ko kahibawo karon kon pila kay pwerteng daghana... If makita nga naa didto pwede man na tangtangon,” sumala niini.
Si Alvarez namahayag nga kinahanglan malimpyohan una ni Rama ang iyang ngan sa di pa mahimo nga sakop sa PDP-Laban. “I think for me, pakigkitaan niya ang presidente and then present his case, explanation, proof nga wala jud... Para sa akoa, there is always a way of reaching the president,” dugang sa house speaker atol sa press conference kagahapon sa Cebu Country Club, siyudad sa Sugbo. Si Rama ang giingong apil sa listahan sa narco-politicians nga gihuptan sa presidente. Ang kanhi mayor nihangop sa pamahayag sa House speaker.
“That’s a good development. I’m almost one step on the president’s office. Cause i already have all my papers in the office of Bong Go,” matod ni Rama nga nahinabi sa Superbalita Cebu kagahapon. /