17-anyos nga nag-atubang og rape sa 11-anyos sa Bantayan gidakop

Senior high gipusasan human nalutsan og warrant of arrest sa kasong statutory rape tungod sa paglugos niini sa silingang 11 anyos.

Ang suspek nga si Max (tinuod ngalan gipugngan human menor usab kini) tinunan sa senior high ug taga Barangay Atop-atop, lungsud sa Bantayan, gipusasan sa miaging gabii didto sa ilang panimalay.

Sila si Chief Insp. Florendo Fajardo, hepe sa Bantayan Police, nangulo sa pagsikop ni Max subay sa warrant of arrest nga gi-usyu ni Judge Antonio Marigomen, sa RTC Branch 61 sa Bogo City.

Si SPO1 Mesyl Ducay, hepe sa women and children’s desk sa Bantayan Police Station niasoy sa Superbalita Cebu nga ang kaso nahitabo niadtong Marso 21, 2017 sa alas 8:00 sa gabii.

Si Max nahubog nga nitambong sa birthday party sa silingan.

Apan ang batang babaye dihang nipauli, gisundan ni Max ug gikugos ug gidala sa usa ka bakanting panimalay.

“Gigapos ang iyang duha ka tiil unya gipatan-sa sex video sa selpon samtang gipahimuslan niya ang bata,” dugang ni SPO1 Ducay nga misaysay sa gibutyag sa biktima.

Ang bata misinggit kini makaduha kahigayon apan gitabunan ang iyang baba ug gihulga nga patyon ang iyang mga ginikanan kon mosumbong.

Si Max, nag- on-the-job training (OJT) sa munisipyo, miangkong hubog sa hitabo.

Si SPO1 Ducay nibutyag nga basi sa resulta sa medico-legal paghiling sa bata, nasuta nga nahilabtan gyud kini.

Ang korte mirekumendar og P200,000 nga piyansa.