Angkas di una makapa-angkas
Gihunong na sa motorcycle ride-sharing services, Angkas, ang operasyon niini sa Sugbo sugod alas 6:00 sa miaging gabii, usa ka semana human gimandoan sa Land Transportation Franchising and Regulatory Board (LTFRB).
Didto sa Metro Manila, suspendido na ang operasyon sa Angkas sugod karong adlawa.
Ang mga tagdumala sa Angkas nangayo og pasaylo sa LTFRB ug publiko sa kahasol nga nahitabo.
Tinguha nila nga makig-estorya sa LTFRB ug ubang opisyal sa gobiyerno aron mapangitaan og paagi ang pagpadayon sa ilang operasyon.
Sila si Angeline Tham ug David Medrana, mga tagdumala sa Angkas nisuwat kang LTFRB Chairman Martin Delgra III, pinetsahan og Nobiyembre 16, 2017.
Sa suwat, kini nagpahibawo nga mohunong na ang Angkas pagdawat og bookings ug gamiton ang nahabilin nga mga adlaw sa pagpakigestorya sa ilang mga partner ug pagtuki kon unsaon nga padayon sila nga masuportaan.
Gusto nila mahinabi ang mga opisyal sa LTFRB alang sa kaayohan sa mga pasahero.
“Being such a new technology, we believe that with innovations in transport, regulation is a natural course for government to take,” tipik sa maong suwat sa Angkas. Matod nila wa sila mahibawo kon asa angay moadto o kon asa nga ahensiya angay sila nga mo-apply.
Apan alang LTFRB 7 Director Ahmed Cuizon way pagtugot gikan sa ilang buhatan ang Angkas hinungdan nga illegal ang operasyon niini bisan kon nagpakaaron-ingnon kini nga Transport Network Company (TNC) samtang ang mga
member-partner niini nagpakaaronusab nga nagmaneho og transport network vehicle services (TNVS). “Sa atong balaod, bawal ang
motorcycle, dili pwede pasahe- roan. Unless laws are changed,” pagpasabot ni Cuizon.
Ang direntor nitambag sa Angkas nga mag-usab og negosyo kon gusto niini nga mahimong legal ang operasyon sama sa paghatod og mga suwat, dokumento o parcel.
Sa miaging semana, gipapahunong sa LTFRB ang Angkas human nasuta walay business permit.
Sa pagkakaron, mahimong makaabli sa site sa Angkas apan dili mahimong makabook.