Hatag-bawi nga donasyon

Kining kalit nga pag- withdraw ni Cebu City Mayor Tomas Osmeña sa donasyon sa dakbayan sa Sugbo nga andam na unta nga ihatag ngadto sa Ormoc City, Leyte ug sa San Francisco sa Surigao del Norte nga pulos nangabiktima sa linog, maoy bunga lang sa personal niyang kasuko, kasagmuyo ug kaligutgot.

Wa mahatagi og igong pagtagad sa Ormoc ug sa San Francisco, Surigao ang hinabang unta ngadto kanila hinungdan nga nainsultohan si Osmeña ug tungod niini iyang gibalhin ang hinabang ngadto sa pamilya sa mga sundawo nga nangamatay sa gubat sa Marawi City.

Kabahin unta sa P10.3 million nga gigahin alang sa Ormoc gamiton unta sa pag-instalar og 13 ka generator sets ug duha ka mobile generator sets nga dako na unta nga mapahimuslan sa mga Ormocanons.

Pero naunsa ba sab nga pagkaunsaa nga wa may gihimong pag- follow up ang kadagkuan nga gipangulohan ni kanhi actor ug karon pulitiko na nga si Mayor Richard Gomez.

Midagan na lang og tulo ka buwan nga naghuwat ang tseke sa opisina ni Osmeña wa gyud kini matandog sa buhatan sa mayor.

Di ta kabasol ni Osmeña kay tiaw mo bay ang Cebu City ang nag- initiate aron matabangan sila pero mora lag gibaliwala.

Ang kaluoy ni Osmeña ngadto sa Ormocanons daw sa nahulipan sa kalagot ug kasilag.

Ning uwahi lang, nangayo og pasaylo si Mayor Gomez ug iyang giangkon ang ilang sayop. Dili nila intensiyon ang nahitabo ug siguro tungod lang kini sa kadaghan sa ilang gimbuhaton.

Iyang gihangyo si Mayor Osmeña nga unta i-reconsiderar ang desisyon niini.

Kon lain pa siguro ang mayor mahimong mapasaylo ug madayon og hatag ang donasyon, apan kay si Osmeña man morag layo ra sa tinuod.

Pangutan-a ang mga Sugboanon.